سۆرگوڵ شێخۆ

 

قامیشلۆ- زیاتر لە دوو سەد ساڵە گەلی کورد ڕووبەڕووی هێرشی قرکردن بووەتەوە، سەرەڕای ئەو هەموو کۆمەڵکوژی و قرکردنە و هەڵمەتی ئەنفال و سووتاندنی شار و گوند و هەموو تاوانەکانی دژ بە مرۆڤایەتی، کورد خۆیەتی، نەوەکانی ئەمڕۆ لە بوارەکانی هونەر، چاند، ژیانی ڕۆشنبیری، ئابووری، زمان و لە هەموو بوارەکاندا هەوڵی زیندوو ڕاگرتنی ناسنامەی کوردایەتی خۆیان دەدەن، زیاتر لە زیندوو ڕاگرتنی، دەیانەوێت ئەمە لە یاسا و دەستوورەکاندا مسۆگەر بکەن.

 

منداڵانی ڕۆژئاوای کوردستان کە لە سەردەمی شۆڕشدا چاویان بەڕووی جیهاندا کردەوە، وەک منداڵانی پێش شۆڕش و دوای شۆڕش نین، هۆکارەکەی ئەوەیە کە ئەوان لە ترسی قسەکردن بە زمانی دایکی خۆیان لە بنەماڵەکانیاندا نەژیاون، نە لە قوتابخانەکانیاندا ڕووبەڕووی قەدەغەکردنی قسەکردن بە زمانی کوردی و وتنی گۆرانی کوردی نەبوون، ئەم منداڵانە بەختەوەرن کە بە ڕۆحی کوردایەتی گەورە بوون.

 

هیڤرۆ و نۆدەما کە خوشکن کە لە باوەشی کوردستاندا گەورە بوون، هەر لە منداڵییەوە هەناسەی ئازادییان هەڵمژیوە و تا ئەمڕۆش لەگەڵ ئەم هەستەدا دەژین، بەڵام سەرەڕای بارودۆخی سیاسی و ئەمنی وڵات، هەردوو منداڵەکە هێشتا داوای مافە ڕەواکانی خۆیان دەکەن.

 

هیڤرۆ و نۆدەما ئەیوب هەردووکیان بە زمانی کوردی دایکی خۆیان دەخوێنن و هەوڵدەدەن بە فێربوونی هونەرێک کە خزمەت بە دۆزی کوردایەتییەکەیان دەکەن، کاتە بەتاڵەکانیان پڕ بکەنەوە.

 

نۆدەما تەمەن ١١ ساڵ ئێستا لە پۆلی ٥ی بنەڕەتییە، لەگەڵ خوێندنەکەی، ماوەی سێ ساڵە فێری ئامێرێی مۆسیقای (کەمانچە) دەبێت، نۆدەما یەکێکە لە ئەندامانی ئۆرکێسترای ڕۆژئاوا کە لە ماوەی نۆ ساڵی ڕابردوودا خەریکی بونیادنانی نەوەی نوێی مۆسیقاژەنەکانە.

 

”من نامەوێت شەڕ لەسەر زمانم هەبێت”

نۆدەما تەمەن ١١ ساڵ ڕوونیدەکاتەوە کە لە قۆناغی پێش قوتابخانەوە فێری زمانی کوردی خۆی بووە و وتی: فێربوونی زمانی دایکی بۆ من قورس نییە، چونکە ئێمە بەردەوام فێری قسەکردن بووین، جوانییەکەی ئەوەیە کە ئێمە لە ماڵەوە و لە قوتابخانە بە زمانی کوردی قسە دەکەین، ئێمە دەمانەوێت هەموو کەسێک بە زمانی دایکی خۆی پەروەردە بکرێت، من نامەوێت شەڕ لەسەر زمانم هەبێت، بۆیە پێویستە هەموو کەسێک بتوانێت بە زمانی دایکی خۆی بخوێنێتەوە.

 

هاوسەنگی نێوان زانستی زمانەوانی و بوژانەوەی هونەری

نۆدەما، ژەنیاری کەمانچەی کورد بە پێویست فێربوونی زمانی کوردی نازانێت، بەو پێیەی لە ئۆرکێسترای ڕۆژئاوادا دەژەنێت و سەبارەت بە زیندووکردنەوەی کولتووری وتی: من هەمیشە حەزم لە کەمانچە بووە، ئەوانەی گوێ دەگرن و زیرەکن زوو فێر دەبن.

 

”ئەوە هاوڕێمە”

نۆدەما ڕایگەیاندووە، کە تەنها ئاوازە کوردیەکان دەژەنێت، وتی: ئێمە تەنها ئاوازە کوردیەکان دەژەنین، کەمانچە هاوڕێی منە و زۆرم خۆشدەوێت، هەروەها لە گروپی دۆز گۆرانی دەڵێین.

 

نۆدەما، لەم تەمەنە بچووکەدا، بەهەمان شێوە بەشداری کۆنسێرتەکان دەکات و باس لەو ساتانە دەکات بەم شێوەیە: ئەوان ساتێکی جوانن، چونکە ئێمە گۆرانی دەڵێین و ئاوازە مۆسیقیەکان بە زمانی خۆمان دەڵێین، باشترین شت ئەوەیە کە من تەنها نیم، هاوڕێکانم لە دەوروبەرمن، زمانی کوردی بوونی ئێمەیە.

 

نۆدەما کە ئێستا بە زمانی دایکی دەخوێنێت، بەشداری کۆنسێرتەکان دەکات و گۆرانی دەڵێت، دەیەوێت لە داهاتوودا ببێتە پزیشک، ئامانجی خۆی بەم شێوەیە دەربڕی: منیش فێری کەمانچە دەبم، بەڵام کاتێک گەورە بووم، دەمەوێت پزیشکی بخوێنم و ببمە پزیشکێک کە چارەسەری نەخۆشەکان دەکات.

 

سوود و زیانەکانی بەکارهێنانی مۆبایل

نۆدەما ئاماژەی بەوەشکرد، ڕۆژانە ٣٠ خولەک مۆبایلەکە بەکاردەهێنن و باسی لە مەترسیەکانی کرد بەم شێوەیە: دایکمان زۆرترین جار ٣٠ خولەک یان کاتژمێرێکمان پێدەدات، مەترسی مۆبایلەکە لەوەدایە کە ئازاری چاوەکانمان دەدات و بینینمان کەم دەکاتەوە.

 

مۆبایل منداڵان فێری زۆر شتی خراپ دەکات، ئێمە مۆبایل بەکاردەهێنین بۆ لێکۆڵینەوە لە ئامێرە مۆسیقییەکان و کولتوورەکان و شوێنکەوتنیان، بۆیە پێویستە منداڵان کەمتر مۆبایل بەکاربهێنن، چونکە زیان بە چاویان دەگەیەنێت.

 

نۆدەما جەخت لەسەر بوونی زمانی کوردی دەکاتەوە و بە بوون و دایکی خۆی پێناسەی دەکات، هەروەها هیڤرۆ تەمەنی ١٠ ساڵە و لە پۆلی چوارەمدایە، بەڵام ڕێگایەکی جیاوازی ژیانی بۆ خۆی هەڵبژاردووە، هاوکات دەیەوێت ببێتە نیگارکێشێکی گەورە.

 

لە وێنەی سەر لاپەڕەکانەوە تا وێناکردن لەسەر کانڤاس

هیڤرۆ باسی ئەو وێنانەی کرد، کە دەیکێشێت وتی: من زۆرترین حەزم لە کێشانی وێنەی میوەیە چونکە زۆربەی ئەو وێنانەی کە دروستی دەکەم بەو شێوەیەن، دوای خوێندن کاتژمێر ٦:٠٠ی ئێوارە هەروەها دەچمە پۆلی نیگارکێشان، لە گەڕەکەکەدا منداڵ زۆرن، پێکەوە وێنە دەکێشین و پیشانی یەکتری دەدەین، نەک هەر ئەوە بەڵکو باس لەوە دەکەین کە چۆن وێنەکانمان باشتر بکێشین.

 

هیڤرۆ خەونی گەورەی هەیەو ئەم ئاواتانەی لەبارەی داهاتووی خۆیەوە دەربڕی: کاتێک گەورە دەبم، دەمەوێت نیگارکێشێکی گەورە بم، هەر کاتێک توانیم بە سەرکەوتوویی وێنە لەسەر لاپەڕە بکێشم، ئەوا دەست دەکەم بە وێنەکێشان لەسەر کانڤاس.