گیانلەدەستدانی سێ ژنە دەستگیرکراو لە زیندانی قەرچەک کاردانەوەی نێودەوڵەتی لیکەوتەوە
وەزارەتی دەرەوەی ئەمریکا لە ڕاگەیەندراوێکی فەرمیدا کوژرانی سێ ژنە دەستبەسەرکراوی زیندانی قەرچەکی ئێرانی لە ماوەی دوو هەفتەی ڕابردوودا ئیدانە کرد و ئەم ڕووداوانە بە ڕەنگدانەوەی پێشێلکارییە توندەکانی بەردەوام لە دژی زیندانیانی ژن پێناسە کرد.
ناوەندی هەواڵ
لەناو پەرەسەندنی بانگەوازەکانی مافەکانی مرۆڤ بۆ دەستەبەرکردنی کەرامەتی مرۆڤ لەناو دامەزراوە سزاکاندا، ڕۆژانە پێشێلکارییە قورسەکان بەرامبەر بە زیندانییە ژنەکان ئاشکرا دەبن، بەتایبەتی سەبارەت بە مافە تەندروستییەکانیان. زۆرێک لە ژنە دەستگیرکراوەکان لە زیندانەکاندا بەدەست پشتگوێخستنی پزیشکی و نەبوونی چاودێری دەروونی و جەستەییەوە دەناڵێنن، ئەمەش مەترسی لەسەر ژیانیان دروست دەکات.
لە کاردانەوە بە گیانلەدەستدانی سێ ژنە زیندانی لە زیندانی قەرچەک لە شاری ورامین لە ئێران، لە ماوەی چەند ڕۆژی ڕابردوودا، وەزارەتی دەرەوەی ئەمریکا ئەمڕۆ ١ی تشرینی یەکەم، ڕاگەیەندراوێکی بڵاوکردەوە و تێیدا کوژرانی سۆمەیە ڕەشیدی، جەمیلە عەزیزی و سودەبە ئەسعەدی شەرمەزار کرد و جەختی لەسەر ئەوە کردەوە کە ڕەتکردنەوەی دەستڕاگەیشتن بە زیندانیانی ژن بە خزمەتگوزارییە پزیشکییەکان یەکێکە لە ئامرازەکانی کۆماری ئیسلامی بۆ سەرکوتکردن ناکۆکی.
لە ڕاگەیەندراوەکەدا ئاماژە بەوە کراوە کە ئەو سێ زیندانییە قوربانیی ڕەتکردنەوەی دڕندانەی دەسەڵاتدارانی ئێران لە چاودێری پزیشکی بوون و گیانیان لەدەستداوە. ئەوەشی خستۆتەڕوو، ئەم مردنانە دوای مردنی فەرزانە بیجانپوور لە مانگی یەکی ساڵی ڕابردوودا هات.
وەزارەتەکە سەرنجی ڕاکێشایە سەر ڕاگەیەندراوی ٥٠ ژنە زیندانی سیاسی ڕاگیراو لە زیندانی قەرچەکی شاری ورامین کە مامەڵەی نامرۆڤانەیان لەگەڵ سۆمایە ڕەشیدی و زیندانیانی دیکە شەرمەزار کرد، جەختیان لەوەکردەوە کە ڕەتکردنەوەی خزمەتگوزاریی پزیشکی لە زیندانییەکان یەکێکە لە ئامرازەکانی دەسەڵات بۆ سەرکوتکردنی ناڕەزایەتییەکان.
جەختی لەوە کردەوە کە دەسەڵات ڕێگری لە چارەسەری خۆپیشاندەرانی بریندار دەکات و پزیشکەکان ناچار دەکەن بێدەنگ بن و ڕاپۆرتەکانی پشکنینی جەستەی ساختە دەکەن.
ئەو پێشێلکارییە ترسناکانەی شەرمەزار کرد و داوای لە کۆماری ئیسلامی کرد کە ڕێز لە مافی زیندانییەکان بگرێت و دەست لە کەڵک وەرگرتن لە چاودێری پزیشکی وەک ئامرازێک بۆ سەرکوتکردنی ناڕەزایەتییەکان ڕابگرێت.