نورشەن عەبدی

 

کۆبانێ- لەگەڵ ئامادەکارییەکان بۆ هەڵبژاردنی سەرۆکایەتی و پەرلەمانی تورکیا کە بڕیارە لە ١٤ی ئایاردا بەڕێوەبچێت، پارتی داد و گەشەپێدان-ئاکەپە هەڵمەتی پاکتاوی سیاسی دەستپێکردووە، هەموو ئەو کەسانە دەکاتە ئامانج کە کاریگەرییان لەسەر قۆناغی هەڵبژاردن هەیە، لەنێویاندا سیاسەتمەداران، هونەرمەندان، پارێزەران و میدیای ئازاد.

 

هێزەکانی پۆلیسی تورکیا هەڵیانکوتایە سەر ماڵی دەیان سیاسەتمەدار و چالاکوانی مافی مرۆڤ و ڕۆژنامەنووس لە باکووری کوردستان و تورکیا لە چوارچێوەی هەڵمەتی قڕکردنی سیاسی کە ئاکەپەدا نزیکەی ١٥٠ کەس دەستگیرکران.

 

"بە بەرخۆدان و خەبات، هەموو پلانەکانی تورکیا پووچەڵ دەکەینەوە"

لەیلا ئەحمەد، هونەرمەند و شانۆکار و ئەندامی سەنتەری باقی خادۆ بۆ ڕۆشنبیری و هونەر لە کۆبانێ، باسی لە هەڵمەتی پاکتاوی سیاسی ئاکەپە کرد لە تورکیا و باکووری کوردستان و وتی: تورکیا لە ڕێگەی هەڵمەتی قڕکردنی سیاسییەوە بەدوای لەناوبردنی سیاسەتمەداران و ڕۆژنامەنووسان و چالاکانی مافی مرۆڤدا دەگەڕێت، ئەو هەڵمەتانە بۆیە ڕوودەدەن چونکە ئەو چینانەی وەک میدیای ئازاد، پارێزەر، ڕۆژنامەنووس، هونەرمەند، و سیاسەتمەداران دەتوانن کاریگەرییان هەبێت لەسەر کۆمەڵگە، دەزانین تورکیا هەوڵی سەرکوتکردنی هونەرمەندان دەدات، چونکە لە ڕێگەی هونەرەکەیانەوە دەتوانن ئازار و کارەساتی گەلەکەیان بگەیەننە هەموو جیهان، تورکیا دەیەوێت دەنگی سیاسەتمەداران و توێژە کاریگەرەکانی کۆمەڵگە بێدەنگ بکات، بۆ ئەوەی بتوانێت سیاسەت و دەسەڵاتی خۆی بەسەر خەڵکدا بسەپێنێت، بۆیە لەپێناو پووچەڵکردنەوەی پلانەکانی تورکیا و هەڵمەتی قڕکردنی سیاسی خەڵکی چوار پارچەی کوردستان، گەل ڕیزەکانیان یەکبخەن.

 

"ناتوانیت ئیرادەی ئەوان لەناو ببەیت"

فاتیمە عوسمان، هاوسەرۆکی پارتی یەکێتی دیموکراتیک لە ناحیەی شێران لە ناوچەی فورات لە باکوور و ڕۆژهەڵاتی سوریا، ئاماژەی بەوەکرد دەسەڵاتدارانی تورکیا کەسانی ڕۆشنبیر و خاوەن فکر دەستگیر دەکەن، لەپێناو بڵاو نەکردەوەی چالاکییەکانیان و دروستنەبوونی کاریگەری لەسەر کۆمەڵگە، تورکیا دەزانێت کە ئێستا کاتی داوای ئازادییە، بەو پێیەی خەڵک بێدەنگ نابێت بەرامبەر بەو هەموو پێشێلکارییانە، ئەردۆغان پێی وایە بەهەمان عەقڵیەتی سەرمایەداری و پاوانخوازانە کە ئیرادەی کۆمەڵگە و گەل لەناودەبات، بەردەوام دەبێت لە حوکمڕانی خەڵک، بەڵام ڕاستی ئەمڕۆ پێچەوانەیە، چونکە دەبینین بەرخۆدان و ئیرادەی گەل بەهێزترە لە پاوانخوازەکەی.

 

لە کۆتاییدا فاتیمە عوسمان ئاماژەی بەوەکرد، لە هەر شوێنێک و هەرچییەک حزب و سیاسەت هەبێت، ئیرادەی گەل بەهێزترە لە دەسەڵات و هەمیشە ئەو ئیرادەیە بەسەر نادادپەروەریدا سەردەکەوێت، بەتایبەتی لە باکووری کوردستان، کە دەوڵەتێکی خراپ لە هەموو لایەنەکانی ژیاندا حکوم دەکات، هیواخوازیشە لە هەڵبژاردنەکانی تورکیادا ئیرادەی گەل سەربکەوێت.