Navenda Nûçeyan – Pêla zêdebûna aloziya leşkerî ya li Yemenê, bû sedema mirin û birîndarbûnan. Her wiha veguherî karesateke mezin a mirovî. Der barê rewşa mirovî ya ji kontrolê derdikeve û belavbûna nexweşiyên şewbê ya li nava kampên koçberan de hişyarî tên dayîn.

Li Yemenê hejmara kesên ji cih û warên xwe bûne gihîşt 197 hezar û 906 kes ango 29 hezar û 519 malbatan. Rapora nû, nîşan dide ku ji ber zêdebûna aloziyên leşkerî û xirabûna rewşa ewlehiyê, valahiya di qada alîkariya mirovî de mezin dibe. Bi hezaran malbat ji ber bombebaran û pevçûnan malên xwe diterikînin û pêdiviyên têkildarî stargeh, xurek, av û xizmetên tenduristiyê zêde dibin.

Li Taîzê 97 hezar û 529 kes ango 13 hezar û 925 malbat koçber bûn

Taîz, di nava bajarên ku pêşwaziya koçberan dikin de di rêza ewil de cihdigre. Li Taîzê 97 hezar û 529 kes ango 13 hezar û 925 malbat, li 15 navçeyan belav bûne. Lahicê 50 hezar û 253 kes ango 7 hezar û 179 malbat koçber bûn. Tê ragihandin ku piraniya van kesan ji deverên pevçûnê yên li Taîz û Hodeidahê hatine.

Hate ragihandin ku li Adenê 17 hezar û 782 kes ango 3 hezar û 741 malbat, li Abyanê 14 hezar û 679 kes ango 2 hezar û 97 malbat ji cih û warên xwe bûn. Ev kesan li kamp û civakên navçeyên Khanfir û Zincibarê belav dibin.

Li gorî daneyên herî dawî yên bajarê Hodeidahê, ji navçeyên Hays û Al-Khokhayê 10 hezar û 297 kes ango hezar û 472 malbat ji cih û warên xwe bûn. Herwiha Yekîneya Rêveberiyê, bal kişand ser nîşaneyên pêleke nû ya koçberiya duyemîn a ji Hodeidahê ber bi Adenê ve û diyar kir ku ev tevger tê şopandin û pêdivî tên nirxandin. Li gorî raporê, malbatên koçber ên mayî bi vî awayî belav bûne; li Maribê 412 malbat, li Al-Dhale'e 240 malbat, li Hadhramautê 214 malbat, li Al-Mahrayê 124 malbat û li Shabwayê jî 116 malbat.

Hewcedariya pêdiviyên bingehîn zêde dibe

Yekîneya Rêveberiyê, diyar kir ku malbatên nû koçberbûyî bi şert û mercên mirovî yên dijwar re rûbirû ne û piraniya wan ji bo dabînkirina pêdiviyên xwe yên bingehîn ne xwediyê çavkaniyên têrker in. Pêla koçberiyê barê li ser civakên mêvandar zêde dike û pêdiviyên têkildarî stargeh, xurek, av û xizmetên tenduristiyê jî zêde dibin. Bi taybetî zarok, jin, pîr û kal û kesên xwedî pêdiviyên taybet, hewceyê pêdiviyên bingehîn in.

Yekîniyê, hewldanên xwe yên ji bo tomarkirina kesên koçber û şandina malbatên a ji bo rêxistinên alîkariya mirovî, didomîne.