Enqere – Halîde Turkoglu, Berdevka Meclîsa Jinan a Partiya Wekhevî û Demokrasiyê ya Gelan (Partiya DEM), daxwaza lêpirsînek parlementoyê li ser serpêhatiyên Paula Maier kir. Paula Maier yek ji 16 ciwanên enternasyonalîst e ku ji Almanya hatine Mêrdînê da ku piştgiriyê bidin gelê Rojava li dijî êrîşên komên girêdayî hikûmeta demkî ya Sûriyeyê yên li ser Bakur û Rojhilatê Sûriyeyê, dema ku ew di girtîgehê de bû. Halîde Turkoglu daxwaza lêpirsînê li ser îdiayên Paula Maier ên li ser tecawiz, îşkence û şîdetê li navenda ragirtinê kir, binpêkirinên mafên mirovan li van navendan eşkere kir û cezayên pêwîst ên qanûnî li dijî berpirsiyaran bi kar bîne. Halîde Turkoglu her wiha pirsek parlementoyê ji Wezîrê Karên Hundir Mustafa Çiftçi re di derbarê vê mijarê de pêşkêş kir.

Zêdebûna tundiya li ser jinên koçber û penaber

Di pêşniyarnameya xwe de, Halîde Turkoglu bal kişand ser wê rastiyê ku binpêkirinên mafên mirovan ên jinên ku di navendên dersînorkirinê de têne girtin dijîn, pir caran di qada giştî de têne ragihandin. Halîde wiha diyar kir: “Tundiya zayendî, muameleya xerab, tacîz û pêkanînên cudakar, nemaze li dijî jinên koçber û penaber, fikarên cidî li ser ewlehî û parastina mafên bingehîn ên jinan di van navendan de derdixe holê.

Halîde Turkoglu, balkişand ser vegotina giştî ya tundiya ku çalakvana enternasyonalîst a Alman Paula Maier li yek ji van navendan dîtiye. Halîde wiha pê de çû: “16 ciwanên enternasyonalîst ên ku ji Almanya hatin Mêrdînê da ku hevgirtina xwe bi gelê Rojava re li dijî êrîşên li ser Bakur û Rojhilatê Sûriyeyê ji hêla komên girêdayî hikumeta demkî ya Sûriyeyê ve nîşan bidin, di 28’ê Çileya 2026’an de hatin binçavkirin û fermana dersînorkirinê li dijî wan hat dayîn. Ciwan di 29ê Çile de bi rêya bejahî ji Mêrdînê birin Stenbolê û li Balafirgeha Stenbolê bi zorê ji balafirê ku ji bo şandina Almanya lê siwar bûbûn derxistin û birin qereqola polîsan a balafirgehê."

‘Ew rastî tundiya zayendî psîkolojîk û fîzîkî hat’

Halîde Turkoglu, daxuyaniya Paula Maier a di 13’ê Tebaxê de eşkere kiribû, bi bîrxist û  diyar kir ku Paula Maier li navenda dersînorkirinê di hucreya yekkesî de hatiye girtin û ji bilî tecawizê jî rastî tundiya zayendî, psîkolojîk û fîzîkî hatiye.”

Halîde Turkoglu derbarê vê mijarê de ev pirs ji Wezîrê Karên Hundir Mustafa Çiftçi kirin.

“*Di 28’ê Çile de 16 ciwan li ser çi bingehên yasayî hatin binçavkirin û fermana dersînorkirinê li dijî wan hat dayîn?

*Kê ferman da ku ciwan di 29’ê Çile de ji Mêrdînê ji bo Stenbolê werin veguhastin û li Balafirgeha Stenbolê ji balafirê werin daxistin û bibin qereqola polîsan a balafirgehê?

*Hûn ji lêdan, îşkence û muameleya xerab a ku hêzên ewlehiyê di dema veguhastina ciwanan ji Mêrdînê bo Stenbolê de li wan kirine haydar in? Wezareta we dê li ser vê îşkence û muameleya xerab lêpirsînê bide destpêkirin?

*Hûn ji agahdariya ku çalakvana Alman Paula Maier dema ku li qereqola polîsan a balafirgeha Stenbolê dihat ragirtin rastî tundiya zayendî, psîkolojîk û fîzîkî, tevî tecawizê hatiye haydar in? Wezareta we dê der barê daxuyaniya Paula Maier û navenda ku tê de mijar heye lêpirsîn û nirxandina dadwerî bide destpêkirin?

*Gelo Paula Maier di dema ragirtina xwe de gihîştiye xizmetên yasayî, konsulxane û tenduristiyê? Qeydên van proseduran hene?

 *Kîjan karmendên hêzên ewlehiyê di dema ragirtinê de li ser kar bûn? Navenda ku bûyer di dema binçavkirina wê de qewimî?

*Gelo tomarên kameraya ewlehiyê, tomarên binçavkirinê, tomarên ketin û derketinê û tomarên din ên fermî yên navenda binçavkirinê ya ku Paula Maier di navbera 28-30’ê Çile de lê hatiye girtin hene?

*Gelo kesên ku sûcê li dijî çalakvana navneteweyî ya Alman Paula Maier kirine dê werin cezakirin?

*Gelo tê zanîn ku, çalakvanek din jî yê Alman ku berê di bin bernameya Karavana Gel de hatibû Tirkiyeyê, jî diyar kiriye ku berî dersînorkirina wê rastî êrîşa cinsî hatiye? Li ser vê îdiayê lêpirsînek hatiye kirin?

*Di 5 salên dawî de çend gilî li ser binpêkirinên mafên mirovan ên ku jinên li navendên dersînorkirinê dijîn ji wezareta we re hatine şandin? Çend ji van gilînameyan hatine şopandin? Derbarê giliyên pêvajokirî de çi tedbîrên qanûnî hatine girtin?”