Qamişlo- Bi armanca bîranîna 19’emîn salvegera serhildana Qamişloyê ku di 12’ê Adara 2004’an de di encamê de 9 ciwanên Kurd di nav de du zarok hatibûn qetilkirin, bi pêşengiya Rêveberiya Xweser a Herêma Cizîrê, mîtîngek li Stadyûma Şehîdên 12’ê Adarê ya bajarê Qamişlo yê Bakur û Rojhilatê Sûriyeyê hat lidarxistin. Bi sedan şêniyên bajêr, nûnerên Rêveberiya Xweser, rêxistin û tevgerên jinan, Saziya Malbatên Şehîdan, tîmên sporê û hêzên leşkerî di mîtîngê de amade bûn.

Mîtîng bi semfoniyên Koma Serdem a Nûhasî ya muzîkê ya bajarê Hesekê, dest pê kir. Bi navê Saziya Malbatên Şehîdan, Rêveberiya Xweser û Meclisa Dêra Zorê axaftin hatin kirin. Her wiha tîmên kareteyê jî li ser stadyûmê derketin ser dikê û çend hunerên kareteyê pêşkêş kirin.

‘12’ê Adarê veguherî serkeftin û biratiya gelan’

Bi navê Rêxistina Kongra Star Endama  Koordînasyona Kongra Star a Rojava Remziya Mihemed axivî û got: "Şehîdên 12’ê Adara 2004’an bûn ronî û riya şoreşa me, em wan bi bîr tînin û bi rêzdarî bejna xwe li hemberî wan ditewînin. Rojavayê Kurdistanê ku bûye mîrateya tevahî Kurdistanê, gelek êş kişandiye bi taybetî di meha Adarê de lê her dem daxwaz û doza serkeftinê bi ser ketiye. Ew tevliheviyên ku rejîma Baasê dixwest di navbera Kurd û Ereban de çêbike, îro veguherîn serkeftinê. Îro dê ev lîstika herdu tîman bi rihê wekhevî û biratiyê bilîzin, bibe striyek di çavên dijmin û neyaran de."

Mîtîng bi maça fûtbolê ya di navbera Tîma Cizîrê û Dêra Zorê de bi dawî bû.