RRFÎF ÎSLÎM

Xeza – Jinên Sûdanî îro di nava şerekî bi xwîn de ji her tiştî bêpar, di mercên xirab ên dermirovî de dijîn. Jinên Xezayî jî bi heman rengî ji du salan e zêdetir e di nava şerekî ku her tiştî bi xwe re tune de dijîn. Ji ber vê yekê diyar dikin ku ew bi jinên Sûdanî re di nava piştgiriyê de ne. Dilê wan bi hêviya ku rojek pevçûnên bi xwîn bi temamî bi dawî bibin û ji nû ve di mercên bi ewle de bijîn dagirtî ye.

Jinên bi hêz û serbixwe

Utaf el-Qassas, dibêje ku wê li ser platformên medyaya dîjîtal li ser jinên Sûdanî li gelek vîdyoyan temaşe kiriye û hê jî temaşe dike.

Jinên ku wextek bi hêz bûn, serbixwe û bi aramî jiyana xwe didomandin; îro ji ber sûcên ku her roj tên kirin ji xwarin, vexwarin, raketine bêpar in, hem bi fizîkî hem jî psikolojik êşên giran dikşînin û di bin zextên giran de ne.

Utaf el-Qassas diyar dike ku jinên Sûdanî xwişkên wan in, ji ber ku wê li Xezayê êşa dorpêç, birçîbûn, bêwarî û tunebûna mercên jiyanê dîtine, tiştên ku dijîn baş fam dike û bi ber dike û dibêje: “Jinên ku jiyana wan bi aram û hêsan bû, niha di nava şerekî hovane de ne. Şer ne li gorî hest û hêza jinan e, ji aliyê fizîkî û ruhî ve jiyana wan zor kiriye. Jin ji kîjan netew, reng û olê dibin bila bibin mafê wan heye jiyana bi rûmet bijîn. Nabe  ku jin di şerê mêran derxistine de bêmal, bê xwarin û vexwarin û war bimînin. Gelo ev zulma li ser jinan ji ber çi ye? Aliyên navneteweyî yên ku dibêjin azadî û mafên jinan diparêzin gelo çima jinan ji heremên şer, nabin cihên bi ewle û nakevin tevgerê?”

Êşa jinan yek e

Nayfe Ahmed, êşa ku dema li vîdyoyên jinên Sûdanî yên ji Hêzên Piştgiriya Lezgîn lava dikin wan nekujin temaşe dike nikare êşa xwe veşêre. Dibêje ku di vîdyoyek din de jinek ku bi ben bi wesayîda çar mêr tê de ne ve hatiye girêdan û jê tê xwestin bikşîne temaşe kiriye . Diyar dike ku li gelek dîmenên mirov nikare behsa wan bike temaşe kiriye û dibêje ku divê zulma li ser jinan bi dawî bibe, di nava civakê de cihê ku heq dikin bigrin.

Nayfe Ahmed dide zanîn ku êşa jinên Sûdanî û Xezayî yek e lewre ew jineke Xezayî ye û dizane êşa zarokên ku heta nîvê şevê ji birçîna digrîn û ranazên çi ye û wiha didomîne: “Em bi rojan birçî diman. Her dema ku milis û makîneyên mirinê nêz dibûn, me êşa koçberiya dijiya û neçar diman eşyayên xwe bar bikin, carna jî ji tirsa sûcên ku hem behsa wan hatibû kirin hem jî min bi xwe dîtibû bi piyên pêxas direviyam. Ez dizanim jinên Sûdanî û yên cîhanê tiştên ku anîn serê jinen Xezayê dizanin û êşê dikşînin û piştgiriyê didin me. Ger bikaribûna çi ji wan bihata dê ji bo me bikarana. Ji ber wê ez dizanim piştgiriya manewî çiqas girîng e. Ez hêvî dikim ku di demek nêz de ev rewş bi dawî bibe û xwişkên me yên Sûdanî bibin xwedî hêvî û hêz.”

‘Sûcên li Sûdanê  tên kirin di medyayê de nayên dîtin’

Sukeyne Salah jî dibêje ku jin her tiştê hev hîs dikin ji ber wê jî heman êşê dikşînin û wiha didomîne: “Ez her dem ji bo jinên Sûdanî dua dikim, hêvî dikim di demek nêz de ji nava agirê şer rizgar bibin û hovîtî bi dawî bibe. Êşa ku îro jinên Sûdanî dikşînin, pir mezin e, bi qasî yên li Xezayê nakeve medyayê. Sûcên li Xezayê hatin kirin di medyayê de hatin weşandin û li cîhanê bûn sedema bertekan, vê yekê jî li cîhanê piştgiriyê mezintir kir lê ji bo Sûdanê mirov nikare heman tiştî bibêje, sûcên li wê derê tên kirin veşartî dimînin.”

Sukeyne Salah diyar dike ku jin êşa hev hîs dikin û bedela şer a herî giran jin didin û wiha bi dawî dike: “Tehemula van êşan pir zor e. Jin carna dikevin rewşek wisa ku ehemula wê zor e. Ez jineke li Xezayê me û dixwazim zulma li ser xwişkên min ên Sûdanî bi dawî bibe, vê tengasiyê di demek nêz de bi dawî bibe, agirbest li Sûdanê çêbibe.”