Navenda Nûçeyan - Zêdetirî 80 çalakvanên mafên jinan daxuyaniyek belav kirin û tê de hişyarî dan derbarê rewşa girtiya siyasî ya Kurd Sida Xedîr Zade ku piştî gefên hêzên ewlehiyê li girtîgeha navendî ya Urmiyê hewla xwekujiyê dabû.

Cînayetek sîstematîk a li dijî jinan

Çalakvanên jin ên mafên mirovan di daxuyaniya xwe de wiha gotin: "Hewldana întîharê ya Sida Xedîr Zade li Îranê cînayeteke sîstematîk a li dijî jinan e. Em daxwaza piştgirî û weşandina dozên bi vî rengî yên girtiyên jin li Îranê dikin. Em bang li hemû aktîvîstên mafên mirovan, sivîl û siyasî û her wiha hemû saziyên çapemeniyê dikin ku ji bo şert û mercên girtiyên jin destekeke cidî bidin.”

Girtiya siyasî Sida Xedîr Zade ya 32 salî dayika du zarokan e û dema ku di 14'ê Cotmeha 2021'an de ji aliyê hêzên ewlehiyê ve hat girtin, ducanî bû. Derbarê sedemên girtina wê heta niha ti agahî nînin.