Navenda Nûçeyan – Li paytexta Îranê Tahranê jina Kurd ya xelkê Saqizê Jina Emînî  ji aliyê pollîsên exlaqê ve bi hêceta ku porê wê xuya dike rastî îşkenceyê hat û rakirin nexweşxaneyê û di 16’ê Îlonê de jiyana xwe ji dest da. Demek kurt beriya qetilkirina Jîna Emînî, Şiler Resul ji aliyê sîxorek yê rejîma Îranê ve rastî êrîşa tecawizê hat û bi awayek bi guman jiyana xwe ji dest da. Qetilkirina Jina Emînî bû sedema hêrsa gel a li Rojhilatê Kurdistan û Îranê. Bersiva rejîmê ji xwepêşandanên ku li bajarên Îranê û Rojîhilatê derketin, terora girtin û komkujî bû.

Li gor statîstikên ku me ji qad û rêxistinên mafê mirovan ya Îranê bidest xistine ji 16’ê Îlonê heta niha li bajarên Îran û Rojhilatê Kurdistanê 450 hemwelatî hatine qetilkirin ji wan 63 jê zarokên di bin 18 salî de ne. 

Di çalakyên girseyî de ji deh hezaran zêdetir hemwelatî hatin binçavkirin, 18 hezar û 173 kes jî hatin girtin. Ji hemwelatiyê hatine girtin tenê nasnameyên 3 hezar û 332 kesan hatine eşkerekirin. Rejîma Îranê hîna jî bi awayek qanûnî xeber nedane malbatan û terora revandinê berdewam dike.

Bi giştî 156 navçe û bajarên Îran û Rojhilat beşdarî serhildanê bûn. Li bajarên Rojhilat çalakiya greva giştî bi rojan e didome.

143 zanîngeh bi boykot, grev, giştîkirina kantînan û rawestandina perwerdeya fermî bi awayekî aktîf beşdarî xwepêşandanan bûn. Li gor daneyên ku hatin bidestxistin 566 xwendekarên zanîngehê hatin girtin. Her wiha hejmareke mezin ji xebatkarên zanîngehê, mamoste û doktor jî hatin girtin.