HÊVÎDAR ŞENGALÎ

Şengal – Di 28’ê Tebaxê de li Şengalê bi pêşengtiya Tevgera Azadiya Jinên Êzidî (TAJÊ) bi dirûşma ‘Bi rêxistin û têkoşînê em ê bibin pêşengên civaka demokratîk û azad’ Komxebata Ronesansa Jinên Êzidî pêk hat. Di komxebata ku zêdetirî 100 delege beşdar bûn de, mijarên wek pirsgirêkên ferasetê, zayendperestî, kuştin û xwekuştina jinan, bandora fermanê ya li ser jinan, piştî fermanê rewşa jinan, xweparastin û di pêkanîna ronesansê de rola jinan, hatin nîqaşkirin. 

Jinên ku beşdarî komxebatê bûn bi kurtasî nêrînên xwe bi ajansa me re parve kirin.

‘Divê jin xwe perwerde bikin û bighînin serkeftinê’

Endama Yekîtiya Jinên Ciwan ên Êzidxanê Avesta Şengalî diyar kir ku divê hemû jin xwe li ser banga Rêber Apo birêxistin û perwerde bikin û wiha got: “Bi banga Rêber Apo re wek jinên Êzidî û TAJÊ hedefa me ew e ku em bi xurtî gavan biavêjin û pêşengtî ji bangê re bikin. Çavê hemû jinên cîhanê bi taybetî jinên Êzidî li Şengalê ye, li ser jinên Êzidî ku çawa xwe birêxistin û zane kirin e, ronesansa xwe pêk bînin e. Hedefa me ji ronesansê ew e ku jin xwe hîn zêdetir bi rêxistin bikin û perwerde bikin. Piştî fermanê jin ji her alî ve xwe bipêş xistin lê ev têr nake, divê hîn zêdetir were kirin. Ji ber ku hê jî komkujî li ser me heye, bi taybetî jî li ser jinan heye. Em bi hêvî ne ku ev banga Rêber Apo bibe bersîva herî mezin a ji bo dijmin. Hemû jinên Êzidî li ser bangê xwe perwerde bikin û bighên serkeftinê.”   

‘Komxebat dê bibe komxebata azadiyê’

Endama Meclîsa Jinan a Zoravayê Nesrîn Dexîl jî destnîşan kir ku dê ev komxebat bibe komxebata azadiya jinan û ev tişt vegotin: “Em di serî de vê komxebatê diyariyî Rêber Apo dikin, tevgera jinê û hemû jinên cîhanê dikin. Ev komxebata pêşketinê ye û em ê bi vê komxebatê bi ser bikevin. Dê ev komxebat bibe azadiya jinan. Bi rêya vê komxebatê em ê rêya fermanan bigirin.”

‘Bila miletê me vegere Şengalê’

Di berdewama axaftina xwe de Nesrîn Dexîl bal kişand ser biryara Wezareta Koç û Koçberan a Iraqê ku diyar kiribû Êzidiyên li kampan dê bibin xwecihê wê derê û ev nirxandin kir: “Em vê biryara ku li ser miletê me yê li kampan e hatiye dayîn, şermezar dikin û dibêjin bila miletê me vegere ser axa xwe, em naxwazin perçe bibin. Ger ku nezivirin Şengalê wê ji çand û baweriyên xwe, ji Êzdatiyê dûr bikevin. Daxwaza me ji miletê me ew e ku bizvirin Şengalê.”

‘Em ê bibin bersiva 74 fermanan’

Di dawiya axaftina xwe de jî Nesrîn Dexîl li ser girîngiya felsefeya Rêberê Gelê Kurd Abdullah Ocalan a ji bo azadiya jinan û gelên bindest sekinî û ev tişt anîn ziman: “Bi saya fikir û felsefeya Rêber Apo em ê pêşiya fermanan bigirin û bi ser bikevin. Em ê bibin bersiva 74 fermanan. Em li pişta her biryarên Rêbertî ne û piştgiriyê didin. Em bang li jinên Êzidî dikin ku rabin ser piyan. Bi vê wesîleyê em ji Şengalê heta Îmraliyê silavên xwe yên germ û hezkirinên xwe ji Rêber Apo re dişînin. Bi saya fikir û felsefeya Rêber Apo em ê bi ser bikevin. Serkeftin, a me ye.”