Silêmanî – Nagîhan Akarsel di sêyemîn salvegera xwe de li cihê lê hatiye qetilkirin, li taxa Bextiyarî ya Silêmaniyê bi amadebûna rêheval, welatparêz û jinan hate bibîranîn.

Merasîma bîranînê bi deqeyek rêzgirtinê ji bo tevahî giyanên şehîdan dest pê kir. Piştre gul li cihê Akarsel hatiye qetilkirin hatin danîn û find hatin vêxistin.

Piştre ji aliyê çalakvana siyasî Sara Reza ve daxuyanî hate xwendin. Di daxuyaniyê de wiha hate gotin: “Berî sê salan di rih û hestên me jinan û civakê de birînek hate vekirin. Heval û hevrêya me Nagîhan Akarsel ku çeka wê ya herî sade ya ji bo parastina xwe, welat, civakê fikir û pênûsa wê bû, di demekê de ku li gel jinên Başûr hewl dida Navenda Arşîv, Lêkolîn û Pirtûkxaneya Jinên Kurd damezrîne, hate hedefgirtin û şehîd bû.”

‘Niha gotar û armanca Nagîhan Akarselê gihiştiye gelek cihên dinyayê’

Di dewama daxuyaniyê de hate gotin: “Em bi wê çendê nesekinin ku xemgîniya xwe bînin ziman, wê em fêr kirin ku bi hev re xewnên xwe bikin rastî. Xewna gihiştina jina Kurd bi çavkaniya dîroka xwe a bi rêya berhemên wê. Zimanê me cuda bû ji bersivdana wê terorê. Me bi dîroka azadîxwaziyê, bi ked û têkoşînê qurbaniyek zêde daye. Me ewqas ji dîrokê fam kiriye ku bi têkoşîn, ked û israra li ser armancên xwe wî dengî bigihînin hemû cihan.

Niha gotar û armanca Nagîhan Akarselê gihiştiye gelek cihên dinyayê. Di demekê de ku em vê rojê bibîr tînin, jinên welatên Rojhilata Navîn û Ewropayê amadekarî ji bo nasandina pirtûka Nagîhan Akarsel dikin. Êdî em li vê cîhanê ne bi tenê ne, ne tenê çiya dost û piştê me ne. Belku ked û têkoşîna jinan a di warê arşîv, pirtûk, lêkolîn û gotinê de xwe gihandiye hemû aliyên cîhanê.

Nasnameya jina Kurd a azad êdî nasnameyeke ji bo dinyayê cihê şanaziyê ye. Dinya ji me îlham û hêviyê digire. Nagîhan Akarsel bi xebata ku kirî, vegeriya koka nirxên civakî ku bi destên jinan hatiye afirandin.”

‘Em ê riya şehîdan bidomînin’

Endama malbata şehîdan Beyan Ferc ji ajansa me re axivî û diyar kir ku dijmin ji jina azad ditirse ji ber wê bi destê terorîstan Nagîhan Akarsel hate hedefgirtin û wiha got: “Dijminê Kurdan ji jina azad, bi hêz û jîr ditirse, ji ber wê jinan qetil dike. Nagîhan Akarsel dema xwe ji bo avakirina navendekê ya jinan ku bikarin tevahî destkeftî û zanistên jinan tê de arşîv bike, amadekarî dikir hate hedefgirtin. Em ê li ser zanista Jineolojî rê û rêbazên şehîd Zîlan bidomînin. Şehîd Nagîhan û gelek şehîdên din li pey zanist û azadiya jinê şehîd bûne, em jî li Başûrê Kurdistanê soza berdewamiya xebatên wan dubare dikin. Heta dilopa dawî ya xwîna xwe em ê li ser riya wan bidomînin û her tim xebatên wan bidin jiyîn.”