Navenda Nûçeyan — Wezareta Tenduristiyê ya Xezayê duh, daxuyaniyek weşand û diyar kir ku bi zêdekirina 301 kesên ku di çend rojên dawî de hatine dîtin, hejmara giştî ya qurbaniyên şer li Zîvala Xezayê gihîştiye 70 hezar û 100 kesan.

Wezaretê diyar kir ku hejmara kesên di êrişên Îsraîlê de piştî peymana agirbestê li Xezayê jiyana xwe ji dest dane gihîştiye 354 kesan. Li rojhilatê Xan Yûnisê li başûrê Xezayê du zarok hatine kuştin û herî kêm 896 kes jî birîndar bûne. Her wiha hat ragihandin ku 605 cenaze ji bin kavilan hatine derxistin.

Wezaretê diyar kir ku du ji van kesan di êrîşên hewayî yên dawî de hatine kuştin, lê cenazeyên mayî demek dirêj di bin kavilan de hatine parçekirin û veşartin.

Hêzên Îsraîlê îro sibê, di heman demê de bi teqîna avahiyên li bajarên Refeh û Xan Yûnisê yên başûrê Xezayê re, êrîşên hewayî dest pê kirin. Ji dema ku peymana agirbestê di 10’ê Cotmehê de ket meriyetê, hêzên Îsraîlê operasyonên xwe yên sîstematîk ên wêrankirin û hilweşandinê li hemû deverên wêranbûyî berdewam kirine û avahî û beşên mayî yên binesaziyê yên li pişt "xeta zer" hedef girtine.