یەپەژە لەسەر کۆبوونەوەکانی دیمەشق ڕاگەیاندراوی بڵاوکردەوە
فەرماندەیی گشتیی یەپەژە پەیوەست بە کۆبوونەوەکانی لە دیمەشق ڕایگەیاند، جەخت کرایەوە کە یەپەژە وەک هێزێکی تایبەت و ڕێکخراو دەکرێت لە چوارچێوەی وەزارەتی ناوخۆدا ئەنتێگرە بکرێت و کۆبوونەوەکە بە شێوەیەکی ئەرێنی و بونیادنەرانە بەڕێوەچوو.
ناوەندی هەواڵ
فەرماندەیی گشتیی یەکینەکانی پاراستنی ژنان "یەپەژە" سەبارەت بە کۆبوونەوەکانی لە دیمەشق ڕاگەیاندراوێکی بڵاوکردەوە.
ڕاگەیاندراوەکە بەمشێوەیەیە:
“لە ٢٦ـی ئابدا، فەرماندەیی یەکینەکانی پاراستنی ژنانمان "یەپەژە" لەگەڵ شاندێکی فەرمیی وەزارەتی ناوخۆی حکومەتی کاتیی دیمەشق کۆبوونەوەیەکی ئەنجامدا.
لە کۆبوونەوەکەدا، بابەتی ئاسایش و ئارامیی سووریا و دواڕۆژی هاوکاری و هەماهەنگیی نێوان هەردوو لایەن بە شێوەیەکی بەرفراوان تاوتوێ کرا.
تەوەرەی سەرەکیی کۆبوونەوەکە ئایندەی یەپەژە بوو. جەخت کرایەوە کە یەپەژە وەک هێزێکی تایبەت و ڕێکخراو دەکرێت لە چوارچێوەی وەزارەتی ناوخۆدا ئەنتێگرە بکرێت.
کۆبوونەوەکە بە شێوەیەکی ئەرێنی و بونیادنەرانە بەڕێوەچوو، بۆ تەواوکردن و ئەنجامدانەوەی پڕۆسەی ئەنتیگراسیۆن لە چوارچێوەی ڕێککەوتنی ٢٩ـی کانوونی دووەمی ٢٠٢٦ـدا، کۆبوونەوە و دانوستاندنەکانمان بەردەوام دەبن.