ŞIYA Koye

Koye – Ji demên kevnar ve, werzîş wek çalakiyek girîng hatiye hesibandin û tevî zehmetiyan û dûrketinê, jin bi awayekî berbiçav û bi biryardarî beşdar bûne. Bê guman jinên Kurd di şert û mercên cûrbecûr ku derfet ji wan re hatiye dayîn de hebûnek berbiçav nîşan dane, lê dîrok gelek caran rola wan jinên ku şampiyon bûne ji nedîtî ve hatiye. Digel vê yekê kesî nekariye pêşî li rola pêşeng a jinan a di warê werzîşê de bigire.

Îro em dibînin ku jinên ji Kurdistanê beşdarî gelek şampiyoniyan dibin. Nîgar Hemed li bajarê Koyê, lîstikvana voleybolê ye. Nîgar bê navber werzîşa xwe dike û bi berdewamî jinan teşwîq dike ku bikevin warê werzîşê. Xwendekarên Nîgar hêvî dikin ku di pêşerojê de mîna wê bin.

Nîgar Hemed Mehmûd di sala 1973’yan de li bajarê Koye jidayîk bûye. Ji Beşa Zimanê Kurdî ya Koleja Perwerdehiyê ya Zanîngeha Selahedîn a li Hewlêrê mezûn bûye û niha li Enstîtuya Sporê ya Koye wek mamoste dixebite. Ji zarokatiyê ve ew bi voleybolê re eleqedar bû, di sala duyemîn a dibistana navîn de dest bi lîstina wê kir û heya niha jî didomîne.

‘Bi piştevaniyê mirov dighîje armancên xwe’

Mamoste Nîgar Hemed ji ajansa me re qala azmûn, daxwaz û hêviyên xwe kir. Nîgar da zanîn ku ji zarokatiyê ve ji voleybolê hez dikir û lîstikvaniyê xeyal kiriye. Nîgar wiha got: “Ji ber vê yekê, min di sala duyemîn a dibistana navîn de dest pê kir. Wê demê xanim Bahar Mecîd piştgirek min a mezin bû. Ji ber evîna min a kûr a ji bo lîstikê, min bawerî bi xwe anî û tevlî Klûba Koye bûm. Ez jî, bûm endamek fermî. Ez di heman demê de beşek ji Yekîtiya Jinan bûm û çend rahênerên me hebûn ku bi berdewamî me perwerde dikirin da ku em di lîstikê de berdewam bikin. Wan gelek hewl da me û ez ji wan re spasdar im.”

‘Wê demê werzişvanî ji bo keçikek zehmet bû’

Nîgar Hemed destnîşan kir ku di wê demê de ji bo keçekê zehmet bû ku bibe werzişvan, lê birayê wê desteka mezin bûye û wê teşwîq kiriye ku berdewam bike. Nîgar ragihand ku di sala 1992’yan de dema ku Yaneya Koye ji nû ve vebûye, ew jî tevlî bûye û ev agahî dan: “Ez bûm endama komeke lîstikvanan a nêzîk, mîna malbatekê bi hev re di turnuvayên li Duhok, Silêmanî û Hewlêrê de pêşbaziyê dikirin. Me serdana hemû bajaran kirin û demên xweş derbas kirin. Gelek axaftin hebûn ji ber ku ew jinên ku beşdarî wan werzişan dibûn, lê me dev jê berneda. Serokê yaneyê wê demê, Mecîd Mîrxan (rehma Xwedê lê be), piştgirekî mezin bû, her wiha Kurda Xan jî, ku pir piştgirî da me. Carinan bi me re diçû maçan û veguhastin peyda dikir.”

Pirsgirêka herî mezin nebûna hola lîstikan bû

Nîgar Hemed vê rastiyê veneşart ku ew bi gelek pirsgirêkan re rûbirû mane, ya herî berbiçav jî nebûna holeke guncav bûye û wiha pê de çû: “Her carê em diçûn dibistanek cuda, lê ne guncav bû; erd tijî kevir û toz bû. Tevî van hemû zehmetiyan, me berdewam kir û li Koyê tîmek voleybolê bi hejmarek lîstikvanan ava kirin. Me demeke dirêj berdewam kir, lê mixabin tîm ji ber krîza darayî û nebûna piştgiriya hikûmetê, êdî tuneye.”

‘Ev 38 sal in voleybolê dilîzim’

Nîgar Hemed wan kesên ku dibêjin di voleybolê de pêşeng im pîroz kir û anî ziman ku berî wê, jinên din jî hebûne. Nîgar got ku “Naxwazim rola wan kêm bikim. Min berdewam kir û niha ez 38 sal in dilîzim, bi xwendekar û mamosteyan re beşdar dibim. Wekî din, ez rêberek baş a keşfan im û berpirsiyara keşfên jin di rêxistina Oscar de me. Vê yekê kesayetiyek xurt û başbûnek fîzîkî ya baş da min, ji ber ku werzîşkirin tê wateya tenduristiyek çêtir. Ez difikirim ku piraniya malbatan niha piştgiriyê didin keçên xwe û ji zarokên xwe re nabin asteng.”

‘Werzîş ji bo jinan tiştê herî girîng e’

Derbarê girîngiya werzîşê ji bo jinan de, Nîgar Hemed da zanîn ku ew jî jinan teşwîq dike da ku beşdarî werzîşê bibin û wiha domand: “Wekî ku em dibînin, ew kesên ku werzîşê dikin her gav ji tenduristiyek baş kêfxweş dibin û ya girîngtir, ew mirov bêtir civakî dike û alîkariya wan dike ku mîna xwişkan dostaniyên xweşik ava bikin. Dema ku niha li wêneyan dinêrim, çavên min bi hêstiran tijî dibin dema ku wan rojan tînim bîra xwe. Werzîş tê wateya evîn, rêz û dîsîplînê. Ev bingehên werzîşê ne û bêyî wan her tişt hildiweşe. Bila jin evîn, rêz û dîsîplînê bikin dirûşmeya xwe.”

‘Ez kêfxweş im ku jinek bi vê ezmûnê heye’

Xwendekara mamoste Nîgar, Aya Salah Cebar bi şagirta xwe serbilind e. Mamoste Aya Salah hestên xwe wiha anî ziman: “Ez pir kêfxweş im ku mamoste Nîgar li cem min e. Ew kesekî bihêz û wêrek e û wê li peymangehê pir piştgiriya me kiriye û pir eleqedarî xwendekaran e. Di heman demê de lîstikvanek voleybolê ya berbiçav e û ez kêfxweş im ku jinek bi ezmûnek wisa wek mamosteya me heye. Ez ji wê re serkeftinên berdewam dixwazim.”

‘Bi her kesî re wekhev tevdigere’

Xwendevan Guna Govar jî destnîşan kir ku mamoste Nîgar yek ji baştirîn mamosteyên wan e û wiha domand: “Ne tenê di werzîşê de, di hemû waran de. Ew tekane jina di werzîşa Koye de ye ku di kariyera xwe de berdewam kiriye û bandorek zelal çêkiriye. Ji ber vê hêvî dikim ku dema em bighîjin temenê wê, em ê mîna wê bin û mamosteyên din ên mîna Nîgar ji nav me derkevin. Em hêvî dikin ku ew her gav bi me re be. Yek ji taybetmendiyên wê yên herî xweşik ew e ku bi her kesî re wekhev tevdigere, bêyî ku temenê wê çi be. Ew qet hêrs nabe û heke em xeletiyek bikin, ew me rast dike û alîkariya me dike da ku wê dubare nekin.”