ZEYNEB ÎSA

Qamişlo – Tevgera Hîlala Zêrîn a Çanda Jinan ve, bi tevkariya Tevgera Mezopotamiya ya Çand û Hunera Demokratîk (TEV-ÇAND), bi boneya 1’ê Îlonê  Roja Aştî ya Cîhanê 10’emîn Mihrîcana Çand û Hunerê ya Zarokan li dar dixe. 10’emîn Mihrîcana Zarokan îsal bi dirûşmeya “Min destê xwe da destên zarokan, wan ez gihandim azadiya asîmanan” tê lidar xistin.  

Ji bo mihrîcana ku dê sê rojan berdewam bike û dê li bajarê Rimêlanê bê lidarxistin, nêzî hezar û 500 zarok ên ku cihê xwe di nava 83 komên çandî û hunerî de digirin xwe amade kirin. Tê gotin ku dê ji Qamişloyê 35 kom, ji Hesekê 20 kom, ji Reqayê 10, ji Kobanê 9 kom û ji Helebê jî 9 kom beşdarî mîhrîcanê bibin.

Endama Komîteya Amadekar a 10’emîn Mihrîcana Çand û Hunerê ya Zarokan Rehef Zilfo ji ajansa me re behsa amadekirin û bernameyên mihrîcanê kir. 

‘Zarok bi rihê biratiya gelan dê çanda hemû netewan biparêzin’

Rehef Zilfo da zanîn ku her sal di 1’ê Îlonê Roja Aştî ya Cîhanê de mihrîcana zarokan lidar dixin. Rehef ragihand ku ev mihrîcana 10’emîn e ku lidar dixin û wiha got: “Mihrîcana îsal di bin diruşmeya ‘Min destê xwe da destê zarokan, wan ez gihandim azadiya asîmanan’ pêk tê. Ev dirûşme ji nameya ku Rêber Apo ji zarokan re şandibû hat girtin. Em vê mihrîcana îsal diyariyî Rêber Apo dikin. Mihrîcana me wê sê rojan li Rimêlanê berdewam bike. Destpêka vekirina mihrîcanê, wê bi daxuyaniyek pêk bê. Paşê wê gelek çalakiyên cûrbecûr wek komên stranan, şano, dîlan, wênexêzî, lîstikên zarokan, karên destan, hebin. Xwarinên gelêrî bên pêşkêşkirin û wê danûk ji bo zarokan were kelandin. Zengîniyek çanda wê di vê mihrîcanê de dê bê xuyakirin. Komên me yên Sûryan, Ereb û Ermen wê cihê xwe di mihrîcanê de jî bigrin. Ji bo ku zarok hemû çandan nas bikin û xwedî li çanda xwe derkevin û bi yek destî û biratiya gelan xwebatên çand û hunerê bimeşînin.”

‘Ewê di demên cuda de li bajarên din jî bên lidarxistin’

Rehef Zilfo bernameyên her sê rojên mihrîcanê aşkera kir û da zanîn ku wê mihrîcan li bajarê din jî di dî dîrokên cuda de were lidarxistin. Rehef Zilfo ragihand ku di roja yekemîn a mihrîcanê de wê daxuyanî were dayîn û wiha got: “Paşê sînevîzyonek ku li ser kar û xebatên zarokan yên çand û hunerê hatiye amadekirin, dê were temaşekirin. Piştî axaftina li ser navê komîteya amadekar, wê bernameyên hunerî werin pêşkêşkirin. Rojê wê 10 kom stran, dîlan û şanoyên xwe pêşkêş bikin. Di nav de jî wê lîstik ji bo zarokan bên pêşkêşkirin. Di rojên duyemîn û sêyemîn de jî wê 10 kom derkevin stran û dîlanên xwe pêşkêş bikin. Di nav de jî wê xwarinên gelêrî û wênexêzên zarok, wêneyên xwe yên zindî di mihrîcanê de xêz bikin. Wê ev mihrîcan ne tenê li kantona Qamişlo, her wihanli bajarên din ên wek Hesekê, Kobanê û li Helebê jî di dîrokên cûda de were lidarxistin.” 

‘Ev 3 meh in amadekarî tên kirin’

Rehef Zilfo bal kişand ser perwerdeyên zarokan ên berî mihrîcanê û zehmetiyên ku hatin kişandin û wiha domand: “Ev 3 meh in ku em amadekariyên mihrîcanê dikin. Di heftiyê de perwerdeyên muzîk, dîlan û şano yên zarokan hebûn. Ji bo beşê muzîkê 3 stran hatibûn diyarkirin. Beşên şanoyê hene. Şanoyên ku werin pêşkêşkirin gerek li gor psîkolojiya zaroka bin û wêneyên ku werin xêzkirin gerek li gor rihê zarokan bin. Ji bo wê jî gelek amadekarî û kar û xebat ji mihrîcanê re hatin kirin. Komîteya amadekar kom şopandin. Her kom nehat qebûlkirin. Komîteya amadekar koman bi xwe hilbijart ji bo mihrîcanê. Gelek zehmetî nehatin kişandin, ji ber ku ev sîstema amadekirina mihrîcanê her sal hatiye rûniştandin, lê hin lawazbûn di aliyê hazirkirina koman de hebûn. Lê ew jî sererat bûn.” 

‘Zarok ji bo me aştî ne’

Rehef bang li hemû zarokên hemû pêkhateyan kir ku bi yek rihê li mihrîcanê amade bin û wiha bidawî kir: “Em weke Tevgera Hîlala Zêrîn her sal çalakiyên cuda ji bo mihrîcana zarokan lidar dixin. Me xwest îsal di vê mihrîcanê de xwarinên gelêrî, lîstikên zarokan pêşkêş bikin. Zarok bi awayek zindî tabloyên xwe xêz bikin û herî dawî jî danûk ji bo wan bêne kelandin. Em ê di sala bê de jî, hîn çalakiyên xweştir û balkêş ji zarokan re lidar bixin. Em vê mihrîcanê ji bo hemû zarokan li dar dixin, ne tenê zarokên di nav çandê de. Zarok ji bo me aştî ne, em dibêjin bila zarok bi rihê biratiya gelan ji mihrîcana zarokan re amade bin.”