ئێك ژ پەیڤێن دناڤ كومەلگەھێن رۆژهەلاتی و یێ كوردی ژیدا گەلەك دھێتە ڤەگێران، ئەو ژی پیاو سالاری یان باب سالارییە، ئەڤە ژی بۆ دەستهەلاتا نێری دھێت، كو هەردەم ژنان كێم دبینن. سالاری لڤێرە زێدەتر نزیكێ پەیڤا (سەركردە، بالا دەست، حاكم و والی) دھێت و د كومەلگەھێ مە یێ كوردی دا، ئەڤ جورە ھزركرنە یا مشەیە. بۆ نموونە ماموستا مە هەیە و تەخا رەوشەنبیر و خواندەڤانە و كە چ مافی نادەتە كچا خوە كو بخوینیت، مافی ب خووشكا خوە نادەت بخوینیت یان خوە ئەگەر مافی بدەتێ ژی، دێ چاڤدێریەكا زێدە ل سەر دانیت و هەر گاڤا خواندنا خوە تەمام كر، دێ جارەكێ دی بالا دەستییا خوە ل سەر سەپینیت ڤە و دێ بۆ وێ رێگر بیت نە كو پشتەڤان!

جڤاكەكێ سەیرە، وەك تو یێ ماموستا و رەوشەنبیر، دێ چاوان ماموستایەك بیت، خەلكی فێری خواندنێ بكەت و د دەمەكیدا رێگریێ ل نزیكترین كەسێ خوە بكەت؟ ئەڤ سالارییا سەردەمانەیا ماموستا و رەوشەنبیران جهێ پرسیارێ و ل سەر راوەستیانێ یە، تا نوكە رێگریێ ل رەگەزێ مێ ژلایێ نزیكێن وێڤە بهێتە كرنێ، پرسیار ژی دێ ئەڤە بیت، ئایا گومان ژ پەروەردا خوە هەیە؟ دیارە پەروەردكارەكێ باش نەبووی! چاوان ئەگەر پەروەردكارەكێ باش و لێزان بایە، ئەڤا ل بەر دەستێن تە ھاتیە پەروەردەكرن، دا وەك تیرەكێ ئامادەكری بیت و كیڤە ب ھاڤێژی نیشانێ ب پێكیت، نەك بازنێ ل دوورێن نیشانێ.

ژخوە بابەتێ میراتی و بێبەھركرنا كچان، ھێشتا ژ بابەتێن بەرچاڤە و ئەڤ پیاو سالاریا زال دەست ژی ژبۆ كێمكرنا ژنانە كوپرسیارا مافێن خوە نەكەن و دێ بینی ئەڤ برایێ هەنێ یان دەیبابێن هەنێ و سەرەرای رێنمایێن ئایینی دروست جێبەجێدكەن، لێ دەما دھێتە سەر بابەتێ مافێن ژنان دبنە كەسانێن دی و دێ بینی مافێ كچ و خووشك و دایكێن خوە نادەتێ، باب دێ میرات و سەروەتێ مالێ هەمیێ ب سەر كوراندا دابەش كەت و كچان ژی بێ بەھر دكەت!

تو ئەگەر باب بی و ب ئایینی ڤە یێ گرێدای بی و باوەرییا تە پێ ھەیە، حەتمەن دڤێت ڤێ ژی بزانی كو د ئیسلامێ دا بێ باھركرن نینە و كور و كچێن تە میراتگرن و ئەڤا تو دكەی بتنێ تێگەھشتنا پیاو سالاریێ یە و تو ژبیردكەی بێبەھركرنا رەگەزێ مێ حەرامە.