ناوەندی هەواڵ

 

ئێوارەی دوێنء، بەشێک لە چالاکوانان و سیاسەتمەداران لە شارۆچکەی کەلاری ناوەندی ئیدارەی گەرمیان کۆبوونەوە و باسیان لە دۆخی ئێستای باشووری کوردستان و هێرش و پەلامارەکانی دەوڵەتی داگیرکەری تورک کرد و ناڕەزایەتییەکانیان بە بەیاننامەیەک بڵاوکردەوە کە تیایدا هاتبوو:

 

لە سۆنگەی هەستکردنمان بە بەرپرسیارێتی لە بەرامبەر خاک و نیشتیمانەکەماندا، ئەمڕۆ وەکو کۆمەڵێک چالاکوان و کەسایەتی کۆبووینەوە و تاوتوێی چەند پرسێکی گرنگ و چارەنووسسازمان کرد، کە خۆی لە بەدەمەوە چوونی پرسی ژینگە و وەستانەوە دژی پەلامارەکانی سەر هەرێمی کوردستان دەبینێتەوە.

 

لە بەیاننامەکەدا ئەوەش هاتووە، دەوڵەتی تورکیا بەردەوامە لە هێرش و پەلامارەکانی بۆ سەر هەرێمی کوردستان، لە ئێستاشدا ناوچەی بادینانی گرتووەتەوە و ١٥ کیلۆمەتر هاتووەتە ناو قوڵایی خاکی هەرێم، هەروەها ٧ بنکەی سەربازی نوێی داناوە، کە بووەتە هۆی ئاوارە بوونی دانیشتوانی ئەو ناوچانە و سووتاندنی دار و درەختەکانیان، ئەمەش مەترسی گەورەی ژینگەیی درووست کردووە.

 

هەروەها ڕایانگەیاندووە، لە ئاستی نێودەوڵەتییدا بێدەنگی لە تاوانی کوشتن و بەزاندنی سنوورەکان دەکرێت، لە کاتێکدا ئامانجی ئەم ‌هێرشانە داگیرکردنی خاکی هەرێم  و ئاوارەکردنی خەڵکی مەدەنییە بەتایبەت گوندنشینان، ئەوەی جێگەی سەرسوڕمانیشە تا ئێستا دەسەڵاتدارانی هەرێم و بەغداد هیچ هەڵوێستێکیان نەبووە.

 

چالاکوانان داوا لە خەڵکی گەرمیان دەکەن، لایەنە سیاسییەکان و ڕێکخراوەکانی کۆمەڵگەی مەدەنی بێنە دەنگ و هەڵوێسی نیشتیمانی خۆیان بەرامبەر ئەم داگیرکارییانە ڕابگەیەنن، وەک دەستپێکیش داوای بایکۆتی کاڵای تورکی دەکەین.

 

لە کۆتایی بەیاننامەکەدا ئەوەش هاتووە، لە ڕۆژانی داهاتوو وەڵامی سوتاندنی ڕەز و باخەکانی هەرێم، بە چاندنی نەمام و چەند کۆڕ و سیمینارێک دەدینەوە، دواتریش هەڵمەتی کۆکردنەوەی واژۆ بۆ دادگای باڵای تاوانەکانی عێراق دەست پێ دەکەین.