ناوەندی هەواڵ

 

سەرۆکوەزیرانی عێراق ڕۆژی یەکشەممە هەڵمەتێکی بۆ بەرەنگاربوونەوەی کاریگەرییە سەختەکانی گۆڕانی کەشوهەوا لەسەر عێراق ڕاگەیاند لە کاتێکدا لەژێر هەڕەشەی کەمبوونەوەی ئاودایە، چاندنی ٥ ملیۆن دار خورما و نەمام لەو هەنگاوانەن کە عێراق وەک ڕێگا چارەسەری دەیگرێتەبەر لە شارەکانی عێراق.

 

 عێراق دەوڵەمەندە بە نەوت بەڵام لە ژێر کاریگەری بەرزی پلەکانی گەرمای هاوینە و وشکەساڵی بەردەوام و بە بیابانبوون و زریانی خۆڵبارینی بەردەوامدایە، ڕووبەری سەوزایی لە عێراق کەمبووەتەوە ئەمەش مەترسی دروستکردووە لەسەر ئاسایشی خۆراک، تەندروستی، ژینگە و کۆمەڵگە.

 

سەرۆکوەزیرانی عێراق لە کۆنفرانسێکی کەشوهەوادا ڕایگەیاند، زیاتر لە حەوت ملیۆن هاوڵاتی عێراقی کەوتوونەتە ژێر کاریگەری گۆڕانی کەشوهەوا و سەدان هەزار کەسیش بەهۆی وشکەساڵییەوە ئاوارەبوون.

 

لە بەهاری ساڵی ڕابردوودا، دەیان زریانی گەورەی خۆڵ بەغدا و ناوچەکانی دیکەی گرتەوە، ئەمەش بووە هۆی دروستبوونی کێشەی هەناسەدانی هەزاران کەس و بەهۆیەوە ناچاربوون فڕۆکەخانە و قوتابخانەکان دابخرێن.

 

لە ئێستادا هەنگاوە چارەسەرییەکان گیراوەتە بەر بە ئامانجی پێشخستنی وزەی پاک و نوێبووەوە، پڕۆژەی نوێی ئاودێری و پاککردنەوەی ئاو و کەمکردنەوەی سووتانی غاز، بەبێ ئەوەی وردەکارییەکانی پارەدان و چوارچێوەی کاتی ڕابگەیەنێت.

 

سەرۆکوەزیرانی عێراق ئاماژەی بەوەشداوە بەردەوامن لە هەوڵەکانیان بۆ پاراستنی مافەکانی عێراق لە ئاوی ڕووبارەکانی دیجلە و فورات کرد، کە بەنداوەکانی سەرەوەی ڕووبارەکانی تورکیا و ئێران هۆکاری کەمبوونەوەی ئاوی هەردوو ڕووبارەکەن.

 

وەک بەشێک لە پلانەکانی حکومەت ئاماژەی بە دروستکردنی پشتێنەی سەوز لە دەوروبەری شارەکان کرد بۆ ئەوەی وەکو ڕێگری با لە بەرامبەر زریانی تۆز و خۆڵدا کاربکەن، لە وڵاتێکدا کە ٪٣٩ خاکەکەی بە بیابان بووە یان کاریگەری بیابانبوونیان لەسەرە.