بنەماڵەی زیندانیانی قەزل هەزار نیگەرانن
چەند ڕۆژێک دوای ئەوەی پاسەوانەکان هەڵیانکوتایە سەر بەندی ٤ی زیندانی قەزڵ هەزار و گواستنەوەی چەند زیندانییەکی سیاسی بۆ ژووری تاکەکەسی، زانیاری لەسەر بارودۆخیان کەم بووە و تا ئێستاش بنەماڵەکانیان نازانن چارەنووسیان چی دەبێت.
ناوەندی هەواڵ
دوای ئۆپەراسیۆنەکەی ٢٩ی ئادار، هەموو پەیوەندییە تەلەفۆنییەکان لەگەڵ زیندانییەکان پچران و بانگەوازی خێزانەکانیان بۆ دەسەڵاتداران بێ وەڵام مانەوە، سەرچاوە نزیکەکانی ئەو بنەماڵانە دەڵێن کە ئەم کەمی زانیارییە لەگەڵ ڕاپۆرتەکانی مانگرتن لە خواردنی زیندانییەکان، نیگەرانییەکانی لەبارەی تەندروستی و باری جەستەیی ئەوانەوە دروستکردووە.
لەگەڵ بەردەوامی لەسێدارەدانی نهێنی، نیگەرانییەکان لە چارەنووسی زیندانیانی سیاسی دیکە، وەک پەخشان عەزیزی، وریشە مورادی و شەهناز تەباری پەرەی سەندووە. لە چەند هەفتەی ڕابردوودا، لەگەڵ توندبوونەوەی قەیرانی جەنگ، زیندانیانی سیاسی ڕووبەڕووی سنووردارکردنی توند و زیادبوونی فشاری ئەمنی بوونەتەوە و تا ئێستاش بارودۆخیان نادیارە.
سەرچاوەکانی مافی مرۆڤ هۆشدارییان دا لە زیادبوونی فشارەکان بۆ سەر زیندانیانی سیاسی، بەتایبەتی دوای لەسێدارەدانی ئەم دواییانە.
چالاکوانانی مافی مرۆڤ دەڵێن: بەردەوامی کەمی زانیاری لەسەر بارودۆخی زیندانیان بەتایبەتی لەکاتی مانگرتن لە خواردن، تەندروستیان دەخاتە مەترسییەکی جددی و داوایان کردووە کە بەرپرسان لێپرسینەوەیان لەگەڵدا بکرێت و دڵنیابن لەوەی زیندانیان دەستبەجێ لەگەڵ خێزانەکانیان یەکدەگرنەوە.