Navenda Nûçeyan – Duh şandeyek ji Akademiya Jineolojî ya Rojhilata Navîn, ji bo gihandina nameyên piştgiriyê yên jinên Rojhilata Navîn ên ji welatên wek Misir, Lubnan, Sûdan û Yemenê, serdana Navenda Fermandariya YPJ’ê kir. Şandeyê nameyên ku bi hezkirin û rêzdariyek mezin ji bo pêngava piştgiriya YPJ’ê hatine nivîsandin, ji Fermandariya YPJ’ê re ragihand. Pêngav, di 26’ê Nîsanê de ji aliyê Platforma Çalakiyên Hevbeş a Rêxistin û tevgerên jinan ên Rojavayê Kurdistanê ve hatibû ragihandin.

Şandeya Akademiya Jineolojî di serdana xwe de diyar kir ku ev name nîşaneya yekîtiya têkoşîna jinan a li seranserê cîhanê ye.

YPJ’ê bersiv da nameyên jinan

Di çarçoveya serdanê de îro Fermandariya Giştî ya Yekîneyên Parastina Jinan YPJ’ê daxuyaniyeke nivîskî li ser malpera xwe parve kir. Di daxuyaniya ku bi gotinên “Ji bo hemû deng û peyamên ku piştgirî û teqdîrkirina têkoşîna jinan a li dijî tundrewiyê diyar kirin” destpê kir de, wiha hat gotin: “Em ji bo her peyvek hevgirtina dilsoz bi rêwîtiya me re û ji bo her helwestek ku ezmûna kûr a ku me di parastina mirovahiyê, ax û rûmetê de kişandiye nas kir, spasiya xwe ya kûr pêşkêş dikin.”

‘Ezmûna me bersivek ji bo rastiyeke dijwar bû’

YPJ’ê destnîşan kir ku ezmûna wan di Yekîneyên Parastina Jinan de, ne hilbijartinek kevneşopî bûye û wiha domand: “Bersivek ji bo rastiyek dijwar a ku ji hêla şert û mercên dijwar ve hatî ferzkirin bû. Jin neçar man ku di dilê hevkêşeya parastinê de bin, ne li ser sînorên wê bin. Me ev berpirsyarî ji bo parastina jiyanê û mafê civakên xwe yên hebûna azad û bi ewle li beramber hêzên ku dixwestin mirovahiyê û nasnameyê jê bibin, hilgirt ser milên xwe.”

‘Armanca me avakirina civakek demokratîk bû’

YPJ’ê ragihand ku têkoşîna wan qet ji bo şer nebûye, her gav ji bo parastina jiyanê û vekirina rê ya ji bo aştiyek dadperwer bûye. Daxuyaniya YPJ’ê wiha dom kir: “Çekên ku me hilgirtine çareya dawîn bûn. Lê armanca me ya dawîn, avakirina civatek demokratîk e ku li ser bingeha wekhevî û edaletê ye, ku tê de jin di biryardanê de hevkarên tam in. Em bi tekezî bawer dikin ku hemû gel, bêyî ku nijad an çanda wan çi be, di rûmet û mafên xwe de wekhev in û pirrengî ne gef e, nirxek mirovî ye ku civakan dewlemend dike û yekîtîya wan xurt dike. Bêyî rêzgirtin û parastina vê cihêrengiyê, tu projeyek aştiyê ya rastîn nikare biserkeve.”

‘Hevjiyan di navbera olan de bingeha aramiya civakî ye’

YPJ’ê got “Her wiha em piştrast dikin ku azadiya baweriyê û rûmeta olan divê bêyî cudakarî an jî dûrxistinê werin parastin” û wiha domand: “Hevjiyan di navbera olên cûda de bingeha aramiya civakî ye. Her êrîşek li ser vê prensîbê, êrîşek li ser hemû mirovahiyê ye. Em ji bo pêşerojek ku li hember hemû baweriyan rêz tê girtin û mirov ne li gorî girêdana wan, li gorî mirovahiya wan têne dermankirin, hewl didin.

‘Peyamên piştgiriyê çerxên tundiyê dişkînin’

YPJ’ê da zanîn ku di her peyama piştgirî û berdewamiya vê têkoşînê de dibînin û bawer dikin ku hêza jinan ne tenê di jiyana wan a rûbirûbûna bi pirsgirêkan re ye, di heman demê de di jiyana wan a ji nû ve avakirina civakê û şikandina çerxên tundiyê de ye jî. Di berdewama daxuyaniya YPJ’ê de wiha hat gotin: “Derbarê pêşeroja rola me de, em tekez dikin ku her gavek ber bi aramiyê ve divê naskirina ezmûna me mîsoger bike, destkeftiyên ku bi saya qurbaniyên bi hezaran şehîdan hatine bidestxistin biparêze û beşdariya bi bandor a jinan di hemû saziyên parastin û biryardanê de, di çarçoveyek ku edaletê bi dest dixe û rûmeta hemûyan diparêze, mîsoger bike.”

‘Têkoşîna me ne ji bo şer ji bo jiyaneke azad û bi ewle wê bidome’

Di dawiya daxuyaniya xwe de YPJ’ê ragihand ku ewê têkoşîna xwe bidomînin û wiha got: “Em têkoşîna xwe didomînin, ne ji bo şer, lê ji bo bidawîanîna wê. Ne ji bo desthilatdariyê bi xwe, lê ji bo jiyaneke azad û ewle ji bo hemû gelan.”