Navenda Nûçeyan – Qeyrana mirovî ya li Yemenê roj bi roj kûrtir dibe. Şer û pevçûnên domdar û têkçûna xizmetên bingehîn bi mîlyonan kesan neçar dike ku di şert û mercên dijwar de bijîn. Her wiha ev yek bi kapasîteya alîkariya mirovî ya sînordar û kêmbûna berxwedayîna civakê re dibe sedema qeyranekî mirovî ya cidî.

Komîserê Bilind ê Penaberan ê Neteweyên Yekbûyî (UNHCR), di rapora xwe ya li ser Yemenê de diyar kir ku qeyrana koçberiyê ya li seranserê welat hêj aram nebûye û beravajî tevlihevtir bûye. Di raporê de hate destnîşan kirin ku rewşên awarte berdewam dikin, xizmetên bingehîn û debara jiyanê xirab dibin, kapasîteya civakan ji bo adaptekirina şert û mercên xirab kêm dibe û der barê kûrbûna qeyrana koçberiyê de hişyarî hate dayîn.

UNHCR’ê destnîşan kir ku pevçûnên ku zêdetirê deh sal in didome, ji bo bi mîlyonan kesan veguherî rewşek mayînde û koçberî ji bo bi mîlyonan malbatan bûye şêwazek jiyanê ya bi zorê. Di raporê de hat destnîşankirin ku xizanî û avahiyên sazûmanî yên qels dibin sedema xirabtirbûna rewşê.

19.5 milyon kes hewceyê alîkariyê ne

Raporê, eşkere kir ku li Yemenê nêzî 19.5 milyon kes hewceyê bi alîkarî û parastinê ya mirovî ne. Li gorî raporê, li hundirê welat nêzî 4.8 milyon kesên ji cih û warên xwe bûne hene û piraniya wan kesan bi salan e di kampên qerebalix an jî avahiyên xwedî ewlehiya kêm de jiyana xwe didomînin.

Her wiha raporê, diyar kir ku Yemen hêj ji zêdetirî 63,760 penaber û koçberan qeydkirî re mazûvanî dike, piraniya wan ji Somalî û Etiyopyayê hatine û beşek ji wan bi dehan sal in li welat dijîn.