Stenbol- Çalakiya Dayîkên Şemiyê ku li aqûbeta xizmên xwe yên di binçav de hatine windakirin û qetilkirin dipirsin û dixwazin kiryarên wan bên darizandin, di hefteya hezar û 79'an de berdewam kir. Di çalakiya vê hefteyê de aqûbeta Mahmut Dogan ê 37 salî ya piştî binçavkirinê li Amedê hat qetilkirin, hat pirsîn.

Metna daxuyaniya çapemeniyê ji hêla Endama Komîsyona Girtîgehê ya Şaxa Komeleya Mafên Mirovan (ÎHD) a Stenbolê Sebla Arcanê ve hat xwendin. Sebla Arcan, diyar kir ku malbata Dogan ku 32 sal in li edaletê digerin, dengê Qada Galatasarayê ne û got: “Mahmut Dogan (37) li Amedê dijiya û ajokarê taksiyê bû. Bavê çar zarokan bû. Di 27'ê Mijdara 1993'yan de, danê  nîvro bi taksiya xwe ji mala xwe derket. Dema ku êvarê venegeriya malê, malbata wî bi Qereqola Polîsan a Rezanê ya nêzîkî mala wan re têkilî danî. Qereqolê malbatê şand Midûriyeta Polîsan. Polîsan ji wan re gotin ku Mahmut Dogan di binçav de ye û heke bixwazin dikarin xwarinê ji wî re bînin. Piştî demeke kurt malbatê xwarin anî, lê ji wan re hat gotin, li vir kesek bi vî navî tune ye.”

Wesayîta wî hat dîtin lê tu agahî jê nehat girtin

Sebla Arcan, anî ziman ku malbatê ji bo fêrbûna aqûbeta Mahmut Dogan careke din serî li Qereqola Polîsan a Rezan daye û piştî 3 rojan qereqolê gazî malbatê kiriye û ji wan re gotiye, "Wesayîta ku we wekî diyar kiriye hatiye dizîn li li Qereqola Polîsan a Ovabag a Çinarê ye. Hûn dikarin biçin wê ji wir bînin." Sebla Acan, bilêv kir ku li ser vê malbatê gotiye "Me ji bo wesayîtê gilî nekiriye, me ji bo dîtina Mahmut Dogan serlêdan kiriye." Sebla Arcan, wiha got: “Lê belê, tu encam bi dest neketiye. Wesayîta Mahmût hat dîtin, lê tu agahî jê nehat girtin. Di dawiya lêgerîna 63 rojan de, di 24'ê Çileya 1994'an de, cenazeyê Mahmut Dogan û Abdulselam Kizmaz ê windabûyî li Şikeftên Reçellik ên li gundê Bellitaş ê Çinarê hatin dîtin. Piştre malbatê giliyê sûc li Serdozgeriya Komarê ya Amedê kir. Dozgeriyê bi hinceta ku li nêzî cihê bûyerê teqînek çêbûye û di encamê de gelek kes mirine, doz girt.”

Dosyaya delîlan winda bû

Sebla Arcan, bi bîr xist ku 10 kesên ku wekî "Koma Karacadag" a rêxistinê dihatin nasîn, piştî operasyonên li dijî Hizbullahê di salên 2000'î de li Dadgeha Cezayê Giran a 5'emîn a Amedê hatine darizandin û got: "Yek ji bersûcan, Tahsîn Kara, diyar kir ku ew bi xwe di navbera salên 1992 û 1994'an de beşdarî kuştina 11 kesan bûye û ajovanê taksiyê yê bi navê Mahmut û Abdulselam Kizmaz di nav wan de bûn. Ev daxuyanî di tomarên dadgehê de cih girtin. Tahsîn Kara ku bi cezayê muebetê yê girankirî re rû bi rû bû, ji bo diyarkirina tenduristiya wî ya derûnî sewqî Nexweşxaneya Nexweşiyên Derûnî û Demarî ya Xarpêtê hat kirin. Dosyaya delîlan bi awayekî li nexweşxaneyê winda bû. Bi vê yekê re, dadgehê tenê 12 sal û nîv cezayê girtîgehê da Kara. Ev bûyer di medyaya sereke de bi sernavê 'Dosyaya windabûyî îmamê Hizbullahê xilas kir' hat ragihandin."

Sebla Arcan, tekez kir ku serlêdanên malbatê yên der barê windabûna Dogan de bê encam mane û got: “Ev 32 sal in, kesên ku Mahmut Dogan winda kirine bi bêcezatiyê tên parastin. Ev 32 sal in, dewlet erka xwe ya eşkerekirina vî sûcî û cezakirina sûcdarên wê bi awayekî dadperwerane pêk neaniye. Çiqas sal derbas bibin jî, em ê tu carî dev ji daxwaza edaletê ya ji bo Mahmut Dogan û hemû windahiyên xwe bernedin û ji her kesî re bibîr bixin ku divê dewlet di çarçoveya normên qanûnî yên gerdûnî de tevbigere."

Çalakiya Dayîkên Şemiyê bi danîna qurnefîlan a li Qada Galatasarayê bi dawî bû.