Navenda Nûçeyan – Di daxuyaniyek hevbeş de ku ji hêla zêdetirî 20 rêxistinan ve di bin serokatiya "Kampanyaya Rawestandina Kuştinên Rûmetê" de hat weşandin, cezayên ku ji hunermend Parastu Ahmedi û hunermendên din ên ku beşdarî "Konsera Karavanserayê" bûn re hatine dayîn, bi tundî hatin rexnekirin.

Di daxuyaniyê de hat ragihandin ku 74 qamçî, qedexeya du salan ji çalakiyên hunerî û muzîkê, û qedexeya du salan a seyahetê ya ku li Parastu Ahmedi, heşt muzîkjen û karmendên konserê hatiye sepandin, nayên qebûlkirin.

 ‘Hewldanek ji bo parastina mafên çandî yên jinên Îranî’

Di daxuyaniyê de hate destnîşankirin ku "Konsera Karavanserayê", ku di Kanûna 2024’an de li ser înternetê hate weşandin, ne çalakiyeke sûc bû, lê belê mînakek ji afirîneriya hunerî, azadiya derbirînê û hewldanek ji bo parastina mafên çandî yên jinên Îranî bû.

Di daxuyaniya hevbeş de hate destnîşankirin ku cezakirina hunermendên ku tenê mafê xwe yê hilberîna hunerê û parvekirina karê xwe bi raya giştî re bikar tînin, berdewamiya polîtîkayên tepeserkirinê li dijî jinan, hunermendan û kesên ku di warê çandî de çalak in nîşan dide.

‘Nîşanek azadiya hunerî’

Rêxistinên ku dibin daxuyaniyê de îmzeyê xwe danîne diyar kirin ku Parastu Ahmedî tenê ji ber ku mafê xwe yê stranbêjî û performansê li ser dikê bi kar aniye, rastî zexta dadwerî hatiye. Di daxuyaniyê de hat destnîşankirin ku konserek serhêl bêyî serpoş dayîn û axaftina wê bi temaşevanên ji hev cuda cuda re nikare wekî sûc an gef li ser ewlehiya giştî were hesibandin, lê belê wekî nîşanek azadiya hunerî, afirînerî û mafê hilbijartinê yê jinan tê hesibandin.

Di daxuyaniyê de qamçiyan jî wekî "binpêkirinek eşkere ya rûmeta mirovan" bi nav kir û tekez kir ku cezayên weha nemirovane, rezîl û bi prensîbên mafên mirovan ên bingehîn re ne lihevhatî ne.

Bangawazî

Rêxistinên navneteweyî, tevî Raportorê Taybet ê Neteweyên Yekbûyî yê li ser Îranê, raportorên azadiya derbirînê û mafên çandî, Yekîtiya Ewropayê, rêxistinên mafên mirovan û welatên demokratîk, bang kirin ku bi eşkere biryarê şermezar bikin û mekanîzmayên dîplomatîk û qanûnî ji bo betalkirina wê çalak bikin. Her wiha wan hunermend, akademîsyen, nivîskar, parêzvanên mafên jinan û nûnerên civaka sivîl li çaraliyê cîhanê vexwendin ku hevgirtina xwe bi Parastu Ahmedi û yên din ên ku di heman dozê de têne darizandin re nîşan bidin.

‘Bila tohmetên li dijî Parastu Ehmedî bên rakirin’

Di daxuyaniya hevbeş de her wiha banga rakirina rêziknameyên cudakar ên ku mafê stranbêjiyê, beşdariya wan a wekhev di jiyana çandî de û azadiyên wan ên bingehîn sînordar dikin, hat kirin. Rêxistinên ku îmzeyê xwe li bin daxuyaniyê dane daxwaza vekişandina bê şert û merc a hemû tohmetên li dijî Parastu Ehmedî û hunermendên din kirin û vegerandina mafên wan ên pîşeyî û sivîl. Daxuyanî bi vî awayî bi dawî bû: "Em daxwaza rakirina hemû qedexeyên li dijî Parastu Ehmedî û hevkarên wê, betalkirina tavilê ya cezayên hatine dayîn û bidawîanîna polîtîkayên zextê yên sîstematîk ên li dijî jin û hunermendan li Îranê dikin."