یەمەن

 

کۆمیسیۆنی لێکۆڵینەوەی نیشتمانی داوای لە هەموو لایەنەکانی ململانێکای یەمەن کرد کە پابەندبن بە بنەماکانی یاسا مرۆییە نێودەوڵەتییەکان، هەروەها ڕاستەوخۆ خەڵکی مەدەنی لە یەمەن نەکەنە ئامانج چونکە مەترسییەکی جددی لەسەر ژیانیان دروست دەکات.

 

دوێنێ ٥ی کانوونی دووەم، لیژنەی نیشتمانی بۆ لێکۆڵینەوە لە تۆمەتەکانی پێشێلکردنی مافی مرۆڤ "NCIAVR" ڕایگەیاند کە لە ماوەی ساڵی ٢٠٢٤دا چاودێری کوژران و برینداربوونی زیاتر لە ٦٥٠ کەسی مەدەنی کردووە لە بە ئامانجگرتنی ڕاستەوخۆی لایەنەکانی ململانێی یەمەندا.

 

لیژنەکە لە ڕاگەیەندراوی ساڵانەی خۆیدا ئاماژەی بەوەکردووە، بەدواداچوونیان بۆ ٥٦٤ ڕووداوی بەئامانجگرتنی هاوڵاتیانی مەدەنی لە لایەن هێزە ناکۆکییەکانەوە کردووە لە پارێزگا جیاجیاکانی یەمەن ڕوویداوە، لە ئەنجامدا ٢١٤ هاوڵاتی مەدەنی کوژراون کە ٢٧یان منداڵ و ٦ یان ژن بوون، هاوکات ٤٣٣ کەسی دیکەش برینداربوون لەناویاندا ٧٤ منداڵ و ٥٢ ژنن .

 

لیژنەکە ئاماژەی بەوەدا کە ئەم بەئامانجگرتنانە لە چوارچێوەی بەردەوامی ڕووداوەکانی پێشێلکاری مافی مرۆڤ لە چەند پارێزگایەکدا دێت، ئاماژەی بەوەشکرد کە ساڵی ٢٠٢٤ شایەتحاڵی بەڵگەنامەکردنی قوربانییە مەدەنییەکان بووە لە ئەنجامی پابەندنەبوون بە ئاگربەستی ڕاگەیەندراو، جگە لە ئەنجامدانی پێشێلکارییەکان کە دەگاتە پێشێلکارییە سیستماتیکییەکان، کە دیارترینیان ئۆپەراسیۆنی بۆردومانی بێ جیاوازی بوو.

 

کۆمیسیۆنی لێکۆڵینەوەی نیشتمانی داوای لە هەموو لایەنەکانی ململانێکان کرد کە پابەندی بنەماکانی یاسای مرۆیی نێودەوڵەتی بن، هەروەها بۆردوومانکردنی بێ جیاوازی بۆ سەر ناوچەکانی نیشتەجێبوون و هەموو جۆرە زیانێک بۆ سەر خەڵکی مەدەنی ڕابگرن.

 

لیژنەکە جەختی لەوە کردەوە کە بەردەوامی پێشێلکارییەکان مەترسییەکی جددی بۆ سەر ژیانی خەڵکی مەدەنی لە یەمەن دروست دەکات، ڕێزگرتن لە مافەکانی مرۆڤ و پاراستنی گیانی خەڵکی مەدەنی دەبێت لە پێشینەی کارەکانی هەر هەوڵێک بۆ بەدیهێنانی ئاشتی بێت.