ناوەندی هەواڵ

 

بەرەبەیانی ئەمڕۆ ١١ی تشرینی دووەم دەنگدانی گشتی لە عێراق دەستیپێکرد و بنکەکانی دەنگدان دەرگاکانیان بەڕووی ملیۆنان دەنگدەردا کردەوە بۆ هەڵبژاردنی ئەندامانی پەرلەمانی نوێ.

 

زیاتر لە ٢٠ ملیۆن دەنگدەر بەشداری هەڵبژاردنی پەرلەمانی عێراق دەکەن، کە تا کاتژمێر ٦:٠٠ی ئێوارە بەردەوام دەبێت، لە سەرانسەری شارە جیاوازەکاندا، ئەمەش لەکاتێکدایە کە ڕێوشوێنە ئاسایشییە توندەکان بۆ دڵنیابوون لە بەڕێوەچوونی پڕۆسەی هەڵبژاردنە بە ئاسانی.

 

نزیکەی ٧ هەزارو ٧٠٠ کاندید کە زیاتر لە دوو هەزارو ٢٠٠یان ژنن، کێبڕکێ دەکەن بۆ بەدەستهێنانی ٣٢٩ کورسی پەرلەمان، هەروەها ئەمە شەشەمین هەڵبژاردنی پەرلەمانییە لەدوای ساڵی ٢٠٠٣ەوە، هێزە ئاسایشییەکان و کۆچبەرانی ناوخۆ یەکشەممەی ڕابردوو بە دەنگدانی تایبەت دەنگیان دا و ڕێژەی بەشداریکردن لە یەک ملیۆن و ٣٠٠ هەزار دەنگدەر تێپەڕی.

 

هەڵبژاردنەکان لە ژێر چاودێری ناوخۆیی و نێودەوڵەتیدا بەڕێوەدەچن و بازنە سیاسییەکان پێشبینی ئەوە دەکەن کە ئەنجامەکان دەبێتە هۆی دانوستانێکی درێژخایەن لەنێوان هێزەکانی شیعە و سوننە و کوردەکان بۆ پێکهێنانی حکومەتی داهاتوو.