ناوەندی هەواڵ

 

ئەو بڕیارنامەیەی کە لە لایەن شاری فابرینۆی ئیتالیا پەسەند کراوە، ئامانجی زیادکردنی فشارە نێودەوڵەتییەکانە بۆ ڕاگرتنی لەسێدارەکان و داوا لە دەسەڵاتدارانی ئێران دەکات کە چاویان پێدا بخشێننەوە.

 

ڕۆژی ٢٩ی ئاب، مارتا ڕیتشوتی، ئەندامی ئەنجومەنی شاری فابریانۆ، لە پۆستێکی تۆڕی کۆمەڵایەتیدا ڕایگەیاند، شارەکە بڕیاریداوە ڕەگەزنامەی فەخری بە سێ چالاکوانی ئێرانی کە سزای لەسێدارەدانیان بەسەردا سەپێنراوە، وەک دانپێدانانێک بە خەباتیان بۆ مافە مەدەنییەکان و دادپەروەری کۆمەڵایەتی، ئەم دەستپێشخەرییە چالاکوانان پەخشان عەزیزی،وریشە مورادی، و شەریفە محەمەدی لەخۆدەگرێت.

 

مارتا ڕیتشوتی، وتی: ئەنجومەنی شارەکە بە کۆی دەنگ ڕەزامەندی دەربڕیوە لەسەر بەخشینی ڕەگەزنامەی فەخری بە پەخشان عەزیزی، وریشە مورادی و شەریفە محەمەدی سێ چالاکوانی ئێرانی کە بەهۆی چالاکیی ئاشتیخوازانەیان بۆ بەرگریکردن لە مافەکانی ژنان و کرێکاران سزای لەسێدارەدانیان بەسەردا سەپێنراوە، ئەم پێشنیارە لەسەر داواکاری بەهێزی لیژنەی دەرفەتی یەکسان لە فابریانۆ پێشکەش کرا، کە داوای لە هەموو ئەندامانی ئەنجومەن کرد پشتگیری ئەم پێشنیارە بکەن.

 

ڕوونیکردەوە، پێدانی هاووڵاتیبونی فەخری تەنها کردەوەیەکی هێمای نییە، بەڵکو ئامرازێکە بۆ گەورەکردنی دەنگی ئەو کەسانەی کە خەبات دەکەن بۆ ئازادی و شکۆی مرۆڤ، هەروەها ئامانجی ئەم بڕیارە زیادکردنی فشارە نێودەوڵەتییەکانە بۆ ڕاگرتنی لەسێدارەدان و پاڵنانی دەسەڵاتدارانی ئێران بۆ چاوخشاندنەوە بەم سزانە، کە ئازادی ڕادەربڕین تەنها مافێک نییە، بەڵکو ئامرازێکی بەهێزە بۆ خۆڕاگری و هاوپشتی و بێدەنگییش جۆرێکە لە هاوبەشبوون.