ناوەندی هەواڵ

 

دوێنێ ٢٨ی ئاب، شاندی ئیمراڵی دەم پارتی کە پێکهاتبوون لەپەروین بوڵدان، جێگری سەرۆک پەرلەمانی تورکیا و پەرلەمانتاری وانی دەم پارتی، مەدحەت سانجار، پەرلەمانتاری ڕحای دەم پارتی فایەق ئۆزگور ئەرۆل، پارێزەر لە نووسینگەی یاسایی سەدە، سەردانی دورگەی ئیمرالی کردو سەبارەت بە دیدارەکەیان لەگەڵ ڕێبەری گەلی کورد عەبدوڵا ئۆجالان ئەمڕۆ ڕاگەیاندراوێکیان بڵاوکردەوەو ئاماژەیان بەوەکرد، لە دیدارەکەدا ڕێبەری گەلی کورد وتوویەتی: کۆمەڵگەی دیموکراتیک، ئاشتی و ئەنتێگراسیۆن سێ چەمکی بنەڕەتی پرۆسەکەن.

 

ڕاگەیەندراوەکە بەم شێوەیەیە:

“بۆ ڕاگەیاندن و  ڕای گشتی

لە ٢٨ـی ئابی ٢٠٢٥دا لە ئیمراڵی لەگەڵ بەڕێز عەبدوڵا ئۆجالان دیدارێکی ٣ کاتژمێریمان ئەنجام دا، تەندرووستی بەڕێز ئۆجالان زۆر جێگیر و باش بوو، هەروەها بەڕێز ئۆجالان زۆر بە مۆراڵ بوو.

 

لە دیدارەکەدا بەڕیز ئۆجالان دەربارەی ئێستای پرۆسەی ئاشتی و کۆمەڵگەی دیموکراتیک هەڵسەنگاندنی بەفراوانی کرد و ئاماژەی بەوەدا، پرسەکانی ئێستا لەوپەڕی ئاستی خراپی و داڕزانی خۆیدایە و پێویستی بە چارەسەری هەیە، بۆیە بەم هەستیارییەوە پرۆسەکەی بەڕێوەبردووە و گەیاندوویەتی بەم ئاستە.

 

بەڕێز ئۆجالان وتی، ئامانجمانە پرۆسەکە بە بێ ئازار و  بە ئاسانی کۆتای پێبهێنین، لەو پێناوەشدا چیمان لەدەست بێت دەیکەین.

هەروەها بەڕێز ئۆجالان ئاماژەی بەوەشکرد، کۆمەڵگەی دیموکراتیک، ئاشتی و ئەنتێگراسیۆن سێ چەمکی بنەڕەتی و دیاریکەری ئەم پرۆسەیەیە، تەنها لەسەر ئەم بنەمایە دەتوانن بگەنە ئەنجام، پرۆسەکە پێویستی بە قۆناغێکی نوێ هەیە کە هەموو لایەنەکان هەنگاوی بۆ بنێین.

 

بەڕێز ئۆجالان باسی لەوەشکرد، هەمیشە خواست و ئارەزووی کۆمارێکی دیموکراتیکی و ئەنتێگراسیۆن بووە لەسەر بنەمای کۆمەڵگەی دیموکراتیک؛ گەر لە گرنگی پرۆسەکە تێبگەین و خاوەنداری لێبکرێت ئەوا تەواوی تورکیا سوودمەند دەبێت لێی.

هەندێک لە بازنەی سیاسی و میدیایی لە هەوڵی ئەوەدا ئەم خواستە بەبێ بایەخ و سووک نیشان بدەن، ڕوونە نزیکایەتییەکی لەم شێوەیە زیان بە پرۆسەکە دەگەیەنێت.

 

بەم بۆنەیەوە بەڕێز ئۆجالان جارێکی دیکە، باوەڕی تەواوەتی خۆی بە ئاشتی و دۆستایەتی هەمیشەیی نێوان گەلان دەربڕییەوە.