ناوەندی هەواڵ

 

تاڵیبان لەم دواییانەدا بڕیارێکی دەرکرد کە سنووردارکردنی توندی بەسەر ژناندا سەپاند، وەک ڕێگریکردن لە قسەکردنیان بە دەنگی بەرز لە دەرەوەی ماڵەوە، هەروەها بە تەواوی جەستە و دەموچاویان دابپۆشن.

 

ئەندامانی تەڤگەری بەهێزکردنی ژنانی ئەفغانستان لە ڕێگەی بەیاننامەیەکەوە پشتڕاستیان کردەوە، تاڵیبان بە شێوەیەکی سیستماتیک مافە سەرەتاییەکانی ژنان لە ڕێگەی دەستگیرکردنی ئارەزوومەندانە و نایاسایی پێشێل دەکات و پێشێلکارییەکانی بزووتنەوەکەیان لە دژی چالاکوانانی مەدەنی و میدیایی و کۆمەڵایەتی شەرمەزار کرد.

 

لە بەیاننامەکەدا کە ٢٧ی تشرینی یەکەم لەلایەن ئەندامانی تەڤگەری بەهێزکردنی ژنانی ئەفغانستانەوە بڵاوکراوەتەوە، جەخت لەوە کراوەتەوە، ئەندامانی تەڤگەری ژنان لە کۆمەڵگەیەکی ئازاد و یەکساندا کار بۆ مافەکانی ژنان دەکەن، هەروەها دژی سیاسەتە ژنکوژییەکانی تاڵیبانن بۆ ئەوەی بتوانن بەشداری لەکایە کۆمەڵایەتی و ئابووریی و کایە سیاسییەکاندا بەبێ ترس و سنووردارکردن بکەن.

 

لە بەیاننامەکەدا ئاماژە بە کاریگەرییە نەرێنییەکانی دەستگیرکردنی ئارەزوومەندانە لەسەر ئاسایشی ڕەوشتی و دەروونی ژنان و خێزانەکانیان کراوە، بەو پێیەی دروستکردنی کەشێکی ترس و نائەمنی بۆ ژنان ئامانجێکی ڕوونی تاڵیبانە.

 

تەڤگەرەکە داوای له کۆمەڵگەی نێودەوڵەتی و ڕێکخراوەکانی مافی مرۆڤ کردووە بۆ ڕاگرتنی خێرای ئەم دەستگیرکردنانە و ئازادکردنی هەموو ئەو کەسانەی کە بە شێوەیەکی نایاسایی دەستبەسەر کراون، هاوکات ڕێز لە مافەکانی ژنان بگیرێت، هاوکاری بکەن بۆ بەدیهێنانی دادپەروەری و ئازادی بۆ ژنانی ئەفغانستان و جەخت لەوە بکەنەوە کە نابێت دەنگی ژنان بێدەنگ بکرێت.

 

تەڤگەری بەهێزکردنی ژنان لە ڕێگەی بەیاننامەکەوە جەختی لەوە کردەوە کە هاودەنگی لەگەڵ ژنانی ئەفغانستان بۆ گەیشتن بە ئازادی و دادپەروەری پێویستییەکە کە نابێت پشتگوێ بخرێت.