ناوەندی هەواڵ

 

ئەگەر فاشر بکەوێت، ئەوە واتای ئەوەیە کە هێزەکانی پشتیوانی خێرا هەر پێنج پارێزگای دارفور کۆنتڕۆڵ دەکەن، وڵاتەکە لە نێوان ڕۆژهەڵاتێکدا دابەش دەکات کە لەلایەن سوپای سودان کۆنتڕۆڵ دەکرێت و ڕۆژئاوایەک کە لەلایەن هێزەکانی پشتیوانی خێرا کۆنتڕۆڵ دەکرێت.

 

لە پێشهاتێکی بەرچاو لە ململانێی بەردەوامی نێوان سوپای سودان و هێزەکانی پشتیوانی خێرا کە لە ١٥ی نیسانی ٢٠٢٣ەوە بەردەوامە هێزەکانی پشتیوانی خێرا هێرشێکی بەرفراوانیان لە ڕۆژی ٢٦ی تشرینی یەکەم دەستپێکرد، کە تا ئێستا دڕندانەترین هێرشە، بۆ سەر فاشر، پایتەختی پارێزگای دارفۆری باکوور و یەکێک لە شارە گەورەکانی ڕۆژئاوای سودان.

 

هێرشەکە بووە هۆی ئەوەی هێزەکانی پشتیوانی خێرا چوونە ناو شارەکەوە و دەستیان بەسەر بارەگای فیرقەی شەشەمی پیادەی سوپای سوداندا گرت، لەگەڵ ژمارەیەک گەڕەکی نیشتەجێبوون، کۆنترۆڵی تەواوی شارەکەیان ڕاگەیاند، تا ئێستا هیچ وەڵامێکی فەرمی سوپای سودان سەبارەت بەم تۆمەتانە نەدراوەتەوە.

 

لە بەرامبەردا بەرخۆدانی گەل پێشتر بەردەوامی شەڕەکانی لە فاشر ڕاگەیاند و جەختی لەوە کردەوە، کە خەڵکی فاشر جگە لە چەک و بەرخۆدان لە دژی میلیشیا تیرۆریستییەکان هیچ ڕێگایەکی دیکەی کۆتایییان نییە.

 

تۆڕی پزیشکانی سودان لە ڕاگەیاندراوێکدا هێزەکانی پشتیوانی خێرای بە ئەنجامدانی "پێشێلکاری بەربڵاو" لە شاری فاشر تۆمەتبار کرد و جەختی لەوە کردەوە، کە دەیان هاوڵاتی مەدەنییان کردۆتە ئامانج، دامەزراوە پزیشکییەکان و دەرمانخانەکانیان تاڵان کردووە، هێرشیان کردووەتە سەر نەخۆشخانەکان و دامەزراوە پزیشکییەکان، هەروەها هێرشیان کردووەتە سەر کارمەندانی تەندروستی و نەخۆشەکان، لە چەند ڕۆژی ڕابردوودا ناوەڕۆکی دامەزراوە پزیشکییەکانی شارەکەیان تێکداوە،  تۆڕەکە ئەمەی بە "پێشێلکردنی ئاشکرای یاسا و نۆرمەکانی نێودەوڵەتی" پێناسە کردووە.

 

داوای لە نەتەوە یەکگرتووەکان و ڕێکخراوی تەندروستی جیهانی کرد کە بەپەلە هەنگاو بنێن بۆ پاراستنی هاوڵاتیانی مەدەنی و کارمەندانی تەندروستی، داوای لێپرسینەوەیان لەگەڵ بەرپرسانی ئەو پێشێلکاریانە کرد لەبەردەم دادپەروەری نێودەوڵەتیدا.

 

هەر لەو چوارچێوەیەدا، جێگری سکرتێری گشتی نەتەوە یەکگرتووەکان بۆ کاروباری مرۆیی وتی: لەکاتێکدا شۆڕشگێڕان پێشڕەوی دەکەن بۆ ناو شارەکە و بڕینی ڕێگاکانی هەڵهاتن، سەدان هەزار هاوڵاتی مەدەنی گیریان خواردووە، ترساون، بۆردوومان دەکرێن، برسی دەبن و بێبەش دەبن لە خۆراک، چاودێری تەندروستی، یان پارێزراو.