ناوەندی هەواڵ

 

ڕۆژی شەممە، ٢٠ی ئاب گردێک لە رۆژئاوای شاری کەربەلا ڕووخا بەسەر مەزارگەی قەتارەی عەلی کوڕی ئەبو تاڵیبدا و بەهۆی ئەو داڕمانەوە نزیکەی ١٥ کەس کەوتنە ژێر داروپەردووی گرد و مەزارگەکە.

 

بەپێی ئاماری وەزارەتی تەندروستی عێراق، تا ئێستا ٦ کەسی گیرخواردوو لە ژێر داروپەردووی مەزارگە و گردەکە لە کەربەلا رزگارکراون، هاوکات، ئەمڕۆ دووشەممە، بەڕێوەبەرایەتی بەرگری شارستانی عێراق ڕاگەیەندراوێکی بڵاوکردەوە و تیایدا هاتووە، تیمەکانی فریاگوزاری تەرمی دوو ژن و پیاوێکیان لە ژێر داروپەردووی ڕووداوەکەدا دەرهێناوە.

 

ئاماژەی بەوەشکردووە، ژمارەی ئەو تەرمانەی تا ئێستا دەرهێنراون ٧ تەرمن کە چوار ژن و دوو پیاو و منداڵێکن، لایەنە سیاسییەکانی عێراق پێیانوایە کە ڕووخانی ئەو گردە لە ئەنجامی گەندەڵیی و نۆژەن نەکردنەوەی شوێنەوار و ئاسەوارەکانی عێراقەوەیە.