ڕێکخراوی سارا هێرشی دەوڵەتی تورکیای بۆ سەر کۆبانی شەرمەزار کرد
ڕێکخراوی سارا بۆ تێکۆشان لەبەرامبەر توندوتیژی دژی ژنان ڕاگەیەندراوێکی سەبارەت بە هێرشەکەی دوێنێی دەوڵەتی تورک بۆ سەر ئۆتۆمبێلێک لە کۆبانێ بڵاوکردەوە و بێدەنگی ڕێکخراوە نێودەوڵەتییەکانی شەرمەزار کرد.
ناوەندی هەواڵ
دوێنێ ١٨ی نیسان، فڕۆکەیەکی بێفڕۆکەوانی دەوڵەتی تورکیا ئۆتۆمبێلێکی مەدەنی لە گوندی ئەنبەت لە کۆبانێ بۆردومان کرد و ژن و پیاوێکی بریندار کرد.
ڕێکخراوی سارا بۆ تێکۆشان لەبەرامبەر توندوتیژی دژی ژنان، لە ناوچەی ئەحداس ڕاگەیەندراوێکی سەبارەت بە هێرشەکە بڵاوکردەوە و بێدەنگی ڕێکخراوە نێودەوڵەتییەکانی شەرمەزار کرد.
خەبات محەمەد، ئەندامی ڕێکخراوی سارا ڕاگەیەندراوەکەی خوێندەوەو ئیدانەی هێرشەکانی دەوڵەتی تورک کراو وتی: پیشەنگەکانی شۆڕش هەمیشە دەکرێنە ئامانج بۆ ئەوەی کردەوەکانی دەوڵەتی تورک و چەتەکانی دەرنەکەون.
لە بەیاننامەکەدا هاتووە کە ڕێکخراوە نێودەوڵەتییەکان لە دژی ئەو هێرشانە بێدەنگن و بێدەنگییەکەیان نیشانەی هاوکارییە لەگەڵ دەوڵەتی تورکدا، لە کۆتایی بەیاننامەکەدا داوا لە ڕێکخراوە مرۆییەکان کرا لە بەرامبەر ئەو هێرشانە بوەستن.