ناوەندی هەواڵ

 

هاوپەیمانی ژنان لە بواری ڕۆژنامەگەریدا لە ڕاپۆرتێکدا ناڕەزایی خۆی دەربڕی بەرامبەر ئەو هەڕەشە چاوەڕواننەکراوانەی لە ئەفغانستان لەژێر دەسەڵاتی تالیباندا دەکرێتە سەر ڕۆژنامەنووسانی ژن و ڕایگەیاند کە لە ماوەی ٥ ساڵی ڕابردوودا لانیکەم ٣٣ هەڕەشە و ٧ حاڵەتی کوشتن تۆمارکراوە.

 

هاوپەیمانی ژنانی ڕۆژنامەگەری لە ڕاپۆرتەکەدا ئاماژەی بەوە کردووە کە ژنە ڕۆژنامەنووسانی ئەفغانستان ناچارن لەژێر هەڕەشە و گوشار و سانسۆر و یاسای ستەمکارانە و توندوتیژی و سووکایەتیکردندا بژین و کار بکەن و لە ڕاپۆرتەکەدا ئەمانەی خوارەوە ڕایانگەیاندووە: "رۆژنامەنوسان و دۆخی گشتی ئازادی ڕۆژنامەگەری لە ئەفغانستان لەژێر دەسەڵاتی تالیباندا ڕووبەڕووی چەندین هەڕەشە و گرفت دەبنەوە".

 

هاوپەیمانی ژنان لە بواری ڕۆژنامەگەریدا، لە درێژەی ڕاپۆرتەکەیدا ئاماژەی بەوە کردووە، دوای ئەوەی تاڵیبان لە مانگی ئابی ٢٠٢١دا هاتە سەر دەسەڵات لە ئەفغانستان، لانیکەم ٨٠٠ ژنە ڕۆژنامەنووس و چالاکوانی ئەفغانی بۆ شوێنێکی ئارام گواسترانەوە، هەروەها ڕایگەیاند، تاڵیبان کارکردنی ژنانی ڕۆژنامەنووسانی لە ئەفغانستان قەدەغە کردووە و ڕایگەیاند کە ئەوان ڕۆژنامەنووسان ئیدانە دەکەن و ناچاریان کردووە بێدەنگ بن و هەڕەشەی کوشتنیان لێ دەکەن و ڕێگرییان لە بەشداری ژنان لە ژیانی گشتیدا کردووە.

 

هاوپەیمانی ڕۆژنامەنووسانی ژن هەروەها ڕایگەیاندووە کە بەردەوام دەبن لە کارەکانیان لەسەر بەڵگەنامەکردن و ئاشکراکردنی هەڕەشەکان لەسەر ژنانی ڕۆژنامەنووس لە ئەفغانستان و داوای لە کۆمەڵگەی نێودەوڵەتی کرد سەلامەتی ژنە ڕۆژنامەنووسان مسۆگەر بکەن و ئازادی ڕۆژنامەگەری بپارێزن.