هەڵەبجە

 

گروپی میوزیكی مه‌وله‌وی، گروپێكی خۆبه‌خشی میوزیكیه‌ له‌ شاری هه‌ڵه‌بجه، ماوه‌ی سێ ساڵه‌ دامه‌زراوه‌ و ژه‌نیاره‌كانیان لە هەردوو ڕەگەزن، ئەم گروپە خۆبەخشانە دامەزراوە و ئامانجیان پەرەدانە بە بواری هونەری لە شارەکە، ئێوارەی دوێنێ دوای سێ ساڵ لە دامەزراندنیان، یەکەمین کۆنسێرتیان لە هەڵەبجە ڕێکخست.

 

سەناریا فاروق، یەکێکە لە دەفژەنانی گروپەکە، وتی: ئەندامی ئەم گروپەم و چوار کچ و کوڕین، هۆکاری هەڵبژاردنی ئەم گروپەش ئەوەبوو کە گروپێکی سەرکەوتووە، دڵخۆشم کە توانیومانە بگەینە ئەم قۆناغە و بە دڵی هەموو لایەک دەبێت، ئامێری دەف خولیای خۆم بوو، لە چەندین بۆنە بەشداریمان کردووە و ئەمە یەکەم کۆنسێرتی تایبەتی گروپەکەمانە، پەیامم بۆ کچان و گەنجان ئەوەیە، واز نەهێنن لە خولیاکانیان و بەردەوام بن لە هەوڵدان.

 

ژیلا یاسین، گەنجێکی ترە و بە ئامێری دەف بەشدار بووە، وتی: ماوەی ساڵێکە لێرەم و پاش ئەوەی کۆژەنی گروپەکانم بینی، هەوڵمدا میوزیک و هەڵەبجە ببوژێنینەوە.

 

لە کۆنسێرتەکەدا شەش بەرهەم پیشکەشکرا و لەلایەن ئامادەبووانەوە پێشوازی گەرم لە گەنجان کرا.