ناوەندی هەواڵ

 

ڕۆژی هەینی، دادگای تەکساس بڕیاریدا حەبی میفیریستۆن بۆ لەباربردنی منداڵ قەدەغە بکات، دادگای باڵای ئەمریکا دەستبەجێ بڕیارەکەی سڕ کرد و ڕایگەیاند، پێویستی بە پێداچوونەوەی زانستییە، بەو مەبەستە داوای لە فەرمانگەی خۆراک و دەرمانی ئەمریکا کرد، پشکنینی تەواو بۆ حەبەکە بکەن و لە تەندروستبوونی دڵنیایان بکەنەوە، لە وەڵامدا ئاماژە بەوەکرام بەکارهێنانی حەبەکە تا هەفتەی دەیەمی دووگیانی تەندروستە و لە ٢٠ ساڵی ڕابردوودا لەلایەن پێنج ملیۆن و ٦٠٠ هەزار ژنەوە لە ئەمریکا بۆ لەباربردنی منداڵ بەکارهاتووە.

 

گلۆریا ئاڵرێد، دادوەری پلە باڵای ئەمریکا وتی: هەڵسەنگاندنی زانستیمان دەوێت بۆ ڕێگریکردن لە دەرمانەکە و نامانەوێت دادوەریکردن لەسەر بنەمای ئایدۆلۆجیی ئاینی و بیروباوەڕی تاکە کەسی بێت، بەڵکو دەبێت لەسەر بنەمای زانست بێت، ناشمانەوێت دادگاکان دەستگەیشتنی ژنان بە دەرمانەکە سنووردار بکەن، چونکە ئەوە مەترسی دەخاتە سەر ژیان و تەندروستیی ملیۆنان کەس.

 

دوای بڕیارەکەی دادگای تەکساس خۆپیشاندانێکی فراوان لە لایەن ژنانەوە لە واشنتۆن ئەنجامدرا و لاورا مایەرز، بەڕێوەبەری جێبەجێکاری پلانی دایک و باوکی واشنتۆن، وتاری بۆ زیاتر لە ٥٠٠ ئامادەبووی خۆپیشاندانەکە دا، وتی: ئەگەر گومانت هەیە دەربارەی ئەوەی بۆچی لێرەیت، تۆ لێرەیت بەهۆی ئەوانەوە، ئێمە ڕێگە نادەین توندڕەوان دەست بەسەر وڵاتەکەماندا بگرن، ڕێگە نادەین لە مافەکانمان بێبەشمان بکەن، ئەوان کەمینەن و ئێمە زۆرینەین.