سۆنیا مورادی

 

سنە- لە زۆرێک لە شارەکانی ڕۆژهەڵاتی کوردستان، نەبوونی هەلی کار و پێکهاتە نایەکسانەکان، ساڵانێکە ژنانی لە بازاڕی کاردا پەراوێز خستووە، زۆرجار وەک کارێکی ئاسان و کەم مووچە سەیردەکرێن، بەڵام ژنانی بوێر لە نێوان ئەم کۆت و بەندانەدا سەریان هەڵداوە و کارگە و ڕێڕەوی پەروەردەییان دامەزراندووە، هەروەها سەربەخۆیی ئابووری خۆیان بونیات دەنێن و دەرگای نوێشیان بۆ ژنانی تر کردووەتەوە.

 

کارگێڕی ژنان تەنیا چالاکیەکی ئابووری نییە، بەڵکو کردەوەیەکی بەرەنگاربوونەوەیە کە هەوڵدەدات یاسا نایەکسانەکان بشکێنێت و دەرفەتی ڕاستەقینە بۆ بەهێزکردنی ژنان دروست بکات، سەیران  بەراخاسی، یەکێک لەو ژنانەیە، کە وۆرکشۆپەکەی گۆڕی بۆ جیهانی فێربوون و گەشەکردن و سەربەخۆیی، بووە چرایەک بۆ نەوەیەکی نوێی لە ژنانی گەنج و ژنان کە بەدوای ئازادی و دەرفەتدا دەگەڕێن.

سەیران بەراخاسی، دیزاینەری جلوبەرگ و کارمەندی کەرتی پەروەردە، زیاتر لە بیست و حەوت ساڵە لە پەیمانگاکانی دیزاینی جلوبەرگ لە شاری سنەی ڕۆژهەڵاتی کوردستان کاردەکات، هەروەها نزیکەی حەڤدە ساڵ لەمەوبەر یەکەم وەرشەی دورینی خۆی دامەزراند، لەو کاتەوە هەلی کاری بۆ خوێندکارەکانی ڕەخساندووە.

 

هەروەها بۆ ماوەی دوانزە ساڵ خاوەنی وەرشەی دروومان بووە لە شاری بانە، دواتر گەڕاوەتەوە بۆ شاری سنە کە ماوەی حەوت ساڵە وۆرک شۆپەکەی بەڕێوەدەبات، هەروەها ژمارەیەک خوێندکاری دامەزراندووە کە ساڵانێکی زۆرە پەروەردەی کردووەن، ئاماژەی بەوەشکرد، "هەر لەسەرەتاوە خولیایەکی زۆرم بۆ چنین هەبوو و ویستم شتێکی بەسوود پێشکەش بە کۆمەڵگە و ژنانی ئارەزومەندی ئەم پیشەیە بکەم، بەشێکی زۆر لە خوێندکارەکانم لە شارۆچکە و گوندەکانی دراوسێوە دێن، سەرەڕای سەختی گەشتەکە ئەوان حەز دەکەن بێن بۆ ئەم کارگەریە بە مەبەستی فێربوون، لێرەش ڕاهێنانی پیشەیی وەردەگرن و بڕوانامەی تەکنیکی و پیشەیی و نێودەوڵەتی بەدەستدەهێنن دوای تەواوبوونی خولەکە، ئێستاش خوێندکارم هەیە کە کارگەی بچووکی تایبەت بە خۆیان لە گەڕەکەکانی عەباس ئاباد و بەهاران و شاری بەحست لە شاری سنە کردووەتەوە".

سەیران بەراخاسی ڕوونیشیکردەوە، بەدرێژایی ساڵان شاهیدی نائومێدی و سەرلێشێواوی خوێندکارانی کچ بووە بەتایبەتی دوای تەواوکردنی ڕاهێنانەکانیان بەهۆی نەبوونی دەرفەتی گونجاوەوە، بۆیە بڕیاریدا ژینگەیەکی کارکردنی پراکتیکییان بۆ دابین بکات کە بتوانن دوای تەواوکردنی خوێندن شانبەشانی ئەو کاربکەن و ئەزموون بەدەستبهێنن و خێزانەکانیان دڵنیا بکەنەوە، هەروەها  پیشەسازی جلوبەرگ گرانە، پێویستی بە کڕینی ئامێری دورین و کەرەستەی خاو و کرێی دوکان هەیە، ئەمەش بارگرانییەکی بەرچاو دەخاتە سەر زۆرێک لە خوێندکاران.

 

سەبارەت چالاکییەکەی گوتیشی، ''ساڵانێکە بۆ شارەکانی سنە، بانە، دەهغلان، بیجار، سەردەشت، دیواندەرە و کامیاران ئیش دەکەین و لە ئێستادا بەرهەمهێنانمان لە هەر خولێکدا دەگاتە پێنج یان شەش هەزار پارچە، هەروەها قەبارەی کارێکی وا پێویستی بە وزەی گەنج و چالاک هەیە، بەو پێیەی نزیکەی پانزە دروومانکار هاوکاریمان دەکەن و کرێی کارەکانمان خەرج دەکرێت بەپێی پارچەکە هەندێک لە خوێندکاران بە ئەزموونن و بە بەرهەمهێنانی بەرز کاردەکەن، لەکاتێکدا سەرەتاییەکان بە بەرهەمهێنانی کەمتر کاردەکەن''.

 

سەیران بەراخاسی لە کۆتایی قسەکانیدا وتی: خەون دەبینم خوێندکارەکانم لە ڕووی داراییەوە سەربەخۆ بن و لە ڕووی ئابوورییەوە پێویستیان بە کەس نەبێت، هەروەها هەر جارێک دەبینم یەکێکیان دەست بە پڕۆژەی خۆی دەکات، هەست دەکەم ئەرکێکم بەرامبەر بە ژنانی نەوەی  خۆم و ڕەگەزەکەم جێبەجێ کردووە و ئەمەش گەورەترین شانازییە بۆ من.