ئیمان سەمیر عەلی

 

میسر- هەرچەندە زەینە ڕیف، ژنێکی گەنجە و لە ناوچە گوندنشینەکانی میسری سەرەوە دەژی، بەڵام خولیای بۆ کارکردن لە پیشەی بۆری و خۆشەویستی قووڵی بۆی وایکردووە ناوەکەی بۆ هەمووان بناسرێت، بە لەبەرچاوگرتنی لێهاتوویی بەرچاوی لە پیشەیەکدا کە بە شێوەیەکی نەریتی بە کاری پیاو دادەنرێت، ئەوانەی لە دەوروبەری بوون سەرسوڕمان و سەرلێشێواوییان دەربڕی، وتیان: ژنانێک کە دەستێکی ناسکی وای هەبێت، چۆن دەتوانێت لە بوارێکی ئاوادا کار بکات؟.

 

زەینە ڕیف، تەمەنی ٢٩ ساڵە و خاوەنی بڕوانامەی ناوەندی "دیپلۆمی بازرگانی"یە، باوکی ٢١ ساڵ لەمەوبەر کۆچی دوایی کردوە، دواتر ئەم بەرپرسیارێتی خێزانەکەی گرتۆتە ئەستۆ، هەروەها تامەزرۆی ئەوە بوو کە دەست بە کارێکی تایبەتی خۆی بکات بۆ ئەوەی داهاتێک دابین بکات کە یارمەتی خۆی و خێزانەکەی بدات بۆ دابینکردنی پێداویستییەکانیان.

 

گەشتەکەی لەگەڵ بۆریدا کاتێک دەستی پێکرد کە ڕیکلامێکی لە فەیسبووک بینی کە دەرفەتی خولی پەروەردری بۆری بۆ ژنان لە ڕێکخراوێکی خێرخوازی ناوخۆیی گوندەکەی ڕاگەیاند، ئەویش داواکاری پێشکەش کرد و وەرگیرا.

 

زینە ڕیف، ٢٣ ڕۆژ بەشداری خولی پەروەردەی بۆری کرد و دوای ئەوەی شارەزا بوو لەو کارامەییەدا، کۆمەڵەکە وێنەکانی لە ماڵپەری ڕەسمی خۆی لە فەیسبووک بڵاوکردەوە و ئامادەبوونی بۆ کاری بۆری ڕاگەیاند، هەروەها بۆ ناساندنی خۆی و کارەکانی ماڵپەڕی تایبەتی دروست کرد و هەر زوو دەستی کرد بە وەرگرتنی داواکاری کار، وە دەستی کرد بە پراکتیزەکردنی پیشەکەی بە سەردانی ماڵ و شوێنە بازرگانییەکان و هەر کەسێک کە پێویستی بە بۆریچی هەبوو بێت، بە تێپەڕبوونی کات، بریکارانی دڵسۆزی بەدەستهێنا، بەتایبەتی ژنان کە متمانەیان بە کارەکانی هەبوو.

 

''سەرەڕای ئاڵەنگاریەکان ئیرادەی ئەو سەرکەوتن مسۆگەر دەکات''

 زەینە ڕیف ڕوونیکردەوە، کە ئاڵەنگاریەکان زۆرن، بەتایبەتی کە وەک ژنێک لە پیشەیەکدا کاردەکات کە بە شێوەیەکی نەریتی بە پیشەی پیاوان دادەنرێت، هەروەها یەکەم بەربەستی خێزانەکەی بوو، دایکی و براکانی، کە پێیانوابوو بۆری پیشەیەکی قورسە بۆ ژنان ناگونجێت، کارێکە کە تەنها بۆ پیاوانە، بەڵام خۆشەویستی بۆ ئەو کارە ڕۆحی ئیرادەیی لە ناویدا چاند، پێی وتن کە دەبێت کار بکات بۆ ئەوەی پارە بەدەستبهێنێت و بەشداری لە خەرجییەکانی ماڵدا بکات لەگەڵ زیادبوونی تێچووی ژیانی، وە بە خۆڕاگری و باوەڕبوونی بەو کارەی کە دەیکات، لە کۆتاییدا خێزانەکەی ڕازی بوون.

 

ئاڵەنگاری دووەم لە هەراسانکردنی خەڵک و پەسەندنەکردنی ژنێکەوە هات کە لە بواری بۆریدا کاردەکات، پیشەیەک کە بە شێوەیەکی نەریتی پەیوەندی بە پیاوانەوە هەیە، زۆرجار گوێی لە وتەکانی وەک "چۆن دەتوانیت وەک بۆریچی کار بکەیت؟"، "ژنان وەک بۆریچی کار ناکەن، کارێکی تر بدۆزنەوە"، بەڵام ئەو ئەم قسانەی پشتگوێ خست و جەختی لەوە کردەوە، ئەوەی زۆر گرنگە بۆی ڕەزامەندی خێزانەکەیەتی لەگەڵ ڕەزامەندی لە کارەکەیدا.

 

دوای ساڵ و نیوێک لە کارکردن، زەینە ڕیف بووە یەکێک لە ناسراوترین بۆریچیەکان، بریکارەکانیشی بەتایبەتی داوای دەکەن، ئەمەش بۆچوونی ئەو کەسانەی گۆڕی کە پێشتر دژایەتیان دەکرد و لە ڕەخنەگرەوە بوونە لایەنگر، بە تایبەت لە گوندەکەیدا.

 

زەینە ڕیف خەونی ئەوەیە کە وەرشەی بۆری تایبەت بە خۆی لە ئاسیوت دابمەزرێنێت و لە داهاتوودا فراوانتری بکات بۆ دابینکردنی هەلی کار بۆ ژنان، بەتایبەتی ئەوانەی لە هاوژینەکانیان جیابوونەتەوە، بە ئامانجی یارمەتیدانیان بۆ دەستەبەرکردنی کار و باشترکردنی بارودۆخی ژیانیان.