شەهلا ئەحمەدی

 

ڕوانسەر- لەگەڵ ساردی کەشوهەوا و کورتبوونەوەی ڕۆژەکان ڕەنگی ژیان لە ماڵەکاندا دەگۆڕێت، دەنگی چێشتخانەکان و بۆنی هەویرێکی ترش و دەستەکان کە هەمیشە دەجووڵێن، مژدەی هاتنی زستانە. ئەو ژنانەی لە یەکەم ڕۆژی بەهارەوە بە هاوئاهەنگی لە سروشتدا کاریان کردووە، ئێستا لەگەڵ هاتنی وەرزی پایز  خۆیان بۆ وەرزی زستان ئامادە دەکەن.

 

بۆ زۆرێک لە ژنان ئەم هەوڵە تەنیا درێژەدان بە نەریتێک نییە، بەڵکو وەڵامی قەیران و هەژاری و ناسەقامگیریی ئابوورییە، لە چێشتخانە بچووکەکان و کەوانتەرە گۆڕاو و ڕێک و پێکەکاندا، جیهانێکی بێدەنگ سەرهەڵدەدات. هەر پەرداخێک زەڵاتە، هەر قاپێک هەویرێکی ترش هێمای بەرگری و ژیانە، ئەم ژنانە لەگەڵ گۆڕانی وەرزەکاندا خەبات دەکەن، نەک تەنها بۆ گەرمی ماڵەکانیان، بەڵکو بۆ بەردەوامیی ژیان، بە بێدەنگی و ئارامیی و دەستێکەوە کە بۆنی خاکیان لێدێت.

"ئێستا هیچ بەهایەک لە پارەدا نییە"

خەدیجە مەریدی یەکێکە لەو ژنانەی کە بژێوی ژیانی بە کارکردن لە ماڵەوە پەیدا دەکات، دەستەکانی هەرگیز ناوەستن، بەڵام زەردەخەنەکە هەرگیز لە دەموچاویدا کاڵ نابێتەوە، ساڵانێکی زۆرە خەریکی دروستکردنی دۆشاو بووم، ئەو کاتە بوتڵێک دۆشاو پێنج هەزار تمەن بوو، ئێستا ٢٥٠٢٥٠ هەزارە، جاران پارە بەهای هەبوو، هەندێکجار ناسیاوەکان پارەی زیاتریان دەدا، چونکە پێیان وابوو کارەکەمان پاک و خاوێنە.

 

خەدیجە مەریدی هێواش وەستا و وەک ئەوەی ساڵەکان لە مێشکیدا هەژمار بکات، درێژەی بە قسەکانی دا و وتی: پێشتر بەو پارەیەی کە بەدەستم هێنابوو زێڕم دەکڕی، بەڵام ئێستا تەنیا بەسە بۆ بژێوی خێزانەکە دابینی دەکەم، یان تەنیا دەتوانم پێداویستییەکانی خۆم پێ بکڕم، لەگەڵ ئەم هەڵاوسانە، ئایا هیچ شتێکی تر هەیە بیکەم؟.

"شەو و ڕۆژ کار دەکەم"

خەدیجە مەریدی وەک زۆرێک لە ژنانی تر هەموو ساڵێک کە پاییز دێت خۆی بۆ زستان ئامادە دەکات، ترشیات و و گیای وشککراوە و دۆشاو دروست دەکات، کە هەم ماڵەکە گەرم دەکات و هەم بەشێک لە خەرجییەکانی ژیانی دابین دەکات وتی: من شەو و ڕۆژ لەچێشتخانەکەمان کاردەکەم، یان گیا دەبڕم، ١٠ ساڵە ئەم کارە دەکەم، زۆرێک لە کڕیارەکانم ناسیاو یان خزمن. بەتایبەتی ئەو ژنانەی کە کار دەکەن، چونکە کاتیان نییە هیچ شتێک بۆ خۆیان دروست بکەن.

 

خەدیجە مەریدی هەروەها باسی لە سەختیەکانی ئەو کارە کردو وتی: داهاتی ئەو کارە خراپ نییە، بەڵام زۆر کەمە بە بەراورد بەو کارەی کە ئەنجامی دەدەین، هەندێک شەو بەهۆی ئازاری پشتەوە ناتوانم بخەوم.

 

"دراوسێکان هەمیشە ستایشی پاکوخاوێنی کارەکانمانیان دەکرد"

بیان وەیسی، یەکێکە لەو ژنانەی کە ساڵانێکە خەریکی دروستکردنی دۆشاوەو دەیفرۆشێت و بژێوی ژیانی دابین دەکات، هەروەها لە لای ئاگرەکە دانیشت و ڕۆژانی ڕابردووی خۆی بەبیرهێنایەوە، ڕوونی دەکاتەوە کە کاتێک دۆشاوەکە دەخرایە ناو شووشە، کڕیارەکان یەک بە یەک دەهاتن، وتی: هەمیشە کڕیار هەبوو بۆ دۆشاوەکەم، زۆر باشتر بوو لە ئامادەکراوەکە دراوسێکان هەمیشە ستایشی پاکوخاوێنی کارەکانمانیان دەکرد، چیتر هێزم نییە بۆ ئەنجامدانی ئەو کارانە، زۆر وەستاوم و دادەنیشێم، دراوسێکان هەمیشە ستایشی پاکوخاوێنی کارەکانمانیان دەکرد.

 

"کەس کاری ژنانمان نابینێت"

بیان وەیسی بە دەربڕینێکی ئارامەوە وتی: هەرگیز بیرم لەوە نەدەکردەوە کە کاری ماڵەوە ئەوەندە قورس و ماندووکەر بێت، ئێمەی ژنان بەردەوام کار دەکەین، بەڵام کەس وەک کار نایبینین، دەڵێن ئەوە ئەرکی تۆیە، ماندوێتی ئێمە هەرگیز نابیندرێت، سەرەڕای هەموو ئازارەکانم، هێشتا دۆشاو دروست دەکەم، من پێی دەڵێم دپشاوی کوردی، چونکە بۆنی ژیانی ژنانی لێدێت، ئەوە بەشێکە لە کولتوور و ڕەگ و ڕیشەی ئێمە، خۆزگە ڕۆژێک کارەکانمان دەبیندرا.