NUR EL-MURSUMÎ

Bexda – Jinên Iraqê, xwedî gelek jêhatîbûn û hilberîna hunera destan ên ji bo mîsogerkirina debara xwe ne. Lêbelê, bi pirsgirêkên mîna kêmbûna piştgiriya madî û manevî ya hikûmetê re rû bi rû dimînin. Lewma jinan, hewil didin ji bo pêşketin, pêşxistin û îspatkirina xwe ya di nava civakê de, têkoşînek mezin didin.

29’ê Tebaxê ango duh li paytexta Iraqê ya Bexdayê, bi armanca piştigirî kirina projeyên biçûk, di çarçoveya konferansa "Jin, Welata Di Dilê Welatê De Ye” bazarek hate vekirin. Ev bazar, bi armanca xurkirina aborî, teşwîqkirina projeyên biçûk, mîsogerkirina pêşkêkirina berhemên mîna hunerên dest, xwarinên malê, berhemên hunerî hate vekirin. Her wiha bazar, jinên ji herêmên cûda anî cem hev.

‘Jinên Iraqê afirîner in û ji bo pêşkeftinê vekirî ne’

Yek ji beşdaran hunermenda hunerên destan Şeyma el-Rewwaf, têkildarî armanca projê de wiha axivî: "Armanc piştgirîkirina jinan û projeyên biçûk e. Ev xebar me hertim teşwîq kir û ji bo bihêzbûna jinan a di civaê de bû gavek girîng. Lêbelê, em hê jî bi pirsgirêkên girîng re rû bi rû ne. Pirsgirêka herî mezin, nebûna qadên guncaw a ji bo pêşkêşkirina berhemên me ye. Ez têkildarî wêneyan çêdikim û hewil didim her roj berhemên nû bihilberînim. Em bawer dikin ku jinên Iraqê afirîner in û ji bo pêşkeftinê vekirî ne. Lewma, piştgiriya madî, qada pêşangehê û derfetên kirin û firotinê ji bo me pir girîng e.”

Sêwirînera zînetê Îman Hamîd jî, der barê kar û xebatên xwe de wiha got: "Ez bi kevirên xwezayî zînetan çêdikim. Ez wan bi şêwaza xwe şêwe dikim û ji nû ve sêwirînim. Ez vê karê bi hewesek mezin dikim, lê rastî gelek zehmetiyan hatim. Bi taybetî lêçûnên zêde yên tiştan û hilberînê, me bi rewşekî dijwar re rû bi rû dihêle. Her wiha hinek bazaran ne ji bo projeyên biçûk, ji bo berjewendiyên takakesî tên çêkirin. Ev yek jî barê me zêdetir dike. Em ne tenê ji bo firotina berheman, di heman demê ji bo debara malbatên xwe beşdarî xebatên bivî awayî dibin. Em tiştekî pir zêde naxwazin; tenê derfetek adil dixwazin.”

‘Em xurmeyên bi cûrbecûr û tamên cûda amade dikin’

Hilberînera Xurme û Hingivînê Fatima el-Azarî, jî wiha axivî: "Ez li Wezareta Xwendina Bilind dixebitim, lê di heman demê de projeyek min a bi navê 'Xurma Belh' heye. Em xurmeyên bi cûrbecûr û tamên cûda amade dikin: xurmeyên bişekîr, topên xurmeyê, xurmeyên pelçiqandî û hingivînên sedî sed xwezayî. Em hewl didin ku li gorî mişteriyên xwe tevbigerin. Lê, zehmetiyên herî mezin a projeyên biçûk, nebûna kredî û nebûna qadên pêşkêşkirina berhemên xwe ye. Ger ev derfet bên mîsogerkirin, him emê hilberîna xwe zêde bikin û him jî xwe bigihînin zêdetir mirovan.”

‘Ez dixwazim him çanda xwe zindî bikim û him jî berhemên bi kalîte bihilberînim’

Şêwirînera Modayê Meysûn Cebbar Husûn jî, da zanîn dixwazin çanda xwe zindî bikin û got: “Ez eba û çenteyan çêdikim. Ez ji bo pêşkêşiya berhemên xwe zehmetiyan dijîn, ji ber kirêya salon û dikanan pir zêde ye. Lewma beşdarî bazar û pêşangehan dibim. Ez hertim di karê xwe de ji çanda kevnar a Bexdayê îlham digrim. Ez nexşeya Iraqê, sembolên Haşimî û cilên Kurdî di berhemên xwe de bikartînim. Ez dixwazim him çanda xwe zindî bikim û him jî berhemên bi kalîte hilberînim."

‘Berhemên min xwedî tam û kalîteyek cuda ne’

Hilberînera biharatan Ulâ Alâ, da zanîn xwedî însiyatîfek bi navê 'Biharatên pûng' e û axaftina xwe wiha domand: “Ez hemû biharatan bi destên çêdikim. Berhemên min xwedî tam û kalîteyek cuda ye. Hin biharatên taybet li Iraqê zehmet tên dîtin, lewma ez ji derveyî welat tînim. Her wiha ez sosên cûrbecûr, xwêyên cûda û macûnên xwezayî jî çêdikim. Ev proje, ji bo min ne tenê karek e, di heman demê de rêyekî mîsogerkirina debara malbata min e. Lê, ji bo berdewamkirina me, pêdivî piştgiriya madî û qadên bazarê heye.”

‘Min ji bo pêşketina keça xwe hewildanên mezin da’

Dayika Mişkat Ali, jêhatibûna keça xwe ya sendroma Downê wiha vegot: "Beriya pênc salan min jêhatibûna keça xwe ferq kir. Ji vê rojê vir ve ji bo pêşketina jêhatibûna keça xwe alîkar dibim. Keça min sendrom Downê ye. Lewma, derfet nedît ku perwerdeyek fermî bigre, lê ev yek me neda seknandin. Min ji bo perwerdehiya wê ya li ser înternetê, pêşxistina jêhatibûnên axaftin û ragihandinê alîkariyek mezin da. Min hertim hewl da ji bo keça xwe hawîrdorek guncaw biafirînim. Ez îro bi jêhatibûna keça xwe ya hunera destan serbilind im.”