Navenda Nûçeyan – Şaredariya bajarê Fabriano ya Îtalyayê, bi armanca ku li dijî cezayê darvekirinê bala raya giştî ya nevnetewî bikşîne, biryarek girîng girt. Meclîsa şaredariyê, bi hevdengiyê dayîna hemwelatiya rûmetê ji bo Werîşe Muradî, Pexşan Ezîzî û Şerîfe Mihemedî ji ber ku mafê jin û karekeran parastine li Îranê cezayê darvekirinê lê hatine birîn, erê kir. Ev gav hem nîşaneya piştevaniyê ye, hem jî wek banga ji bo rêveberiya Îranê ku cezayan ji nûve li berçavan derbas bike hate nirxandin. 

Endama Meclîsa şaredariya Fabriano Marta Ricciuti, di daxuyaniya ku li ser hesabê xwe yê medyaya dijîtal parve kirî de, diyar kir ku dayîna hemweltiya rûmetê ji bo Pexşan Ezîzî, Werîşe Muradî û Şerîfe Mihemed ku ji bo mafê jin û mafê karkeran têdikoşiyan, ne tenê jestek sembolîk e, di heman demê de bûyîna dengê têkoşîna ji bo azadî û rûmeta mirovahiyê ye.

‘Bêdengî hevkariya van sûcan e’

Marta Ricciuti da zanîn ku biryar bi pêşniyara Komîsyona Firsendên Wekhev hatiye rojevê û got: “Azadiya îfadeyê ne tenê mafek e, di heman demê de amûra bi hêz a têkoşîn û piştevaniyê ye. Bêdengî jî havkariya van sûcan e.”