Qamişlo – Li bajarê Qamîşlo ya Kantona Cizîrê ya Bakur û Rojhilatê Sûriyeyê ji bo salvegera dehemîn a damezrandina Hêzên Parastina Jinan ên Beth Nehrin ku hêzekî xweser a jinên Asurî û Suryanî ye şahiyek hat lidarxistin.  

Nûnerên Yekîneyên Parastina Jinan (YPJ), nûnerên Rêveberiya Xweser û saziyên wê, tevgerên jinan û Meclisa Jinan a Sûriyeyê beşdarî çalakiyê bûn. Armanca pîrozbahiyê ew bû ku rola navendî ya Hêzên Parastina Jinan ên Beth Nehrin di parastina mafên jinên Suryanî û Asûrî û misogerkirina ewlehî û aramiyê li Bakur û Rojhilatê Sûriyeyê de were destnîşankirin.

Weke bersiva li dijî komkujiyan hat damezrandin

Hêzên Beth Nehrin di 30’ê Tebaxa 2015’an de, wekî bersivek rasterast li hember êrîşên çeteyên DAIŞê yên li herêmê, hatin damezrandin. Îro, ew bûne mînakek ji bo berdewamî û biryardariyê di têkoşînê de, bûne dengê jinên Suryanî yên ku mafê xwe yê jiyaneke azad û ewle diparêzin.

Çalakî bi merasîmeke leşkerî ya ku ji aliyê Hêzên Parastina Jinan ên Beth Nehrin ve hate lidarxistin dest pê kir. Piştî vê yekê, nûnera Hêzên Parastina Jinan ên Beth Nehrin Nûr El-Huru gotarek pêşkêş kir. Nûr El- Huru got, "Şerê me yê li qadê ne tenê têkoşînek li dijî dijmin bû, lê di heman demê de şerekî dirêj li dijî zilm û qedexeyên ku li ser me jinan hatine ferzkirin bû. Îro, em bilind radiwestin û îspat dikin ku çek cudahîyê naxin navbera zayendan û wêrekî mîras nayê girtin, ew di dilê şer de çêdibe."

Şeza Garîbe, seroka Daîreya Parastina Milkê li Qabre Hewore, jî serbilindî û rûmeta xwe ya ji bo rêwîtiya Hêzên Parastina Jinan ên Beth Nehrin anî ziman û rola pêşeng a jinan di têkoşîna ji bo wekhevî û edaletê de tekez kir.

‘Damezrandina hêzê şoreşek rewşenbîrî û civakî bû’

Nûnera Yekîtiya Jinên Suryanî ya Sûriyeyê Corcette Barsum jî di axaftina xwe de got, "Damezrandina Hêzên Parastina Jinan ên Beth Nehrin ne tenê bûyerek leşkerî an rêxistinî bû, lê şoreşek rewşenbîrî û civakî bû. Ew temsîla îradeya azad a jinan bû. Jin ne temaşevanên pasîf ên di rêça dîrokê de ne, lê hêzek çalak in ku guhertinê diafirînin. Jin ruhê berxwedanê di dilê xwe de temsîl dikin. Pêşeroja geş a gelê me tenê dikare li ser wekhevî û edaletê were avakirin; jin û mêr divê di têkoşîna azadî û rûmetê de mil bi mil bisekinin."

Corcette Barsum wiha domand: "Di vê salvegera mezin de, em pabendbûna xwe ya bi prensîbên têkoşîna hevpar re dubare dikin. Meşa Hêzên Parastina Jinan ên Beth Nehrin kevirê bingehîn ê avakirina civakek demokratîk û azad e. Di vê civakê de, nasnameya Beth Nehrin dê were parastin, û mafên hemî zarokan, hem jin û hem jî mêran, dê werin garantîkirin."

Berdevka Yekîneyên Parastina Jinan (YPJ) Viyan Adar di axaftina xwe de bal kişand ser şehîdên şervanên jin û rola wan di parastina ax û gel de.

Çalakî bi pêşandana sînevîzyonekê ku xebat û serkeftinên Hêzên Parastina Jinan ên Beth Nahrin di deh salên borî de nîşan dida, bi dawî bû.