ناوەندی هەواڵ

 

ئەمڕۆ شەممە، دوو قوتابخانەی کچانی دیواندەرە، ئامادەیی پەروین ئیعتسامی و قوتابخانەی ناوەندی عێفات، بە مادەی کیمیایی هێرشیان کرایە سەر و لە ئەنجامی ئەم هێرشەدا ژمارەیەکی زۆر لە قوتابیان ژەهراوی بوون و گواسترانەوە بۆ نەخۆشخانە.

 

ئەو خوێندکارە ژەهراوییانە ئاماژەیان بەوەکردووە، ئەم هێرشانە نزیکەی کاتژمێر ١١:٣٠ خولەکی ئەمڕۆ بووە و لەکاتێکدا کەسانی نەناسراو مادەی کیمیاییەکەیان فڕێداوەتە ناو هۆڵی قوتابخانە و هۆڵەکانی خوێندن، بەرپرسانی قوتابخانەکە دەرگای چوونە ژوورەوە و دەرچوونیان داخستووە و ڕێگرییان لە دەرچوونی خوێندکارەکان کردووە.

 

هەروەها خوێندکارەکان ئاماژەیان بەوەشکردووە، پێش هێرشەکانی ئەمبولانس لە قوتابخانەکەدا ئامادەبوون و خاتوو "وەیسی" بەڕێوەبەری قوتابخانەی عێفات و هاوکارەکانی دیکەی ئامادەکاری تەواویان بۆ ئەو هێرشانە کردووە لەکاتێکدا دەمامکیان بەستووە.

 

دوابەدوای ئەو هێرشانە، خوێندکارە ژەهراویەکان گواسترانەوە بۆ نەخۆشخانەی خومەینی دیواندەرە و لە بەشی فریاکەوتن چاودێری کران، بارودۆخی هەندێکیان مەترسیدارە و دوای چەند کاتژمێرێک لە ژەهراویبوونیان هێشتا لەژێر چاودێری پزیشکدان.