هێلین ئەحمەد

 

سلێمانی_ ژنانی ئازادیخواز لە ڕۆژهەڵاتی ناوەڕاستدا،  لە کاتی دەربڕینی داواکاریەکان و ئەنجامدانی چالاکی لە لایەن دەسەڵاتدارانی ناوچەکە، ڕوبەڕووی سەرکۆنەکردن و کونجی زیندانەکانیان دەکەنەوە، لە ناویاندا ئێران بەردەوام ژنانی سیاسەتمەدار و چالاکوانانی ئازادیخواز پەلکێشی زیندانەکانی دەکات، هاوشێوەی (وریشە مورادی، پەخشان عەزیزی، شەریفە محەمەدی، زەینەب جەلالیان، فاتمە سپێهری، ڕەحلە ڕەحیمی پوور و مەهوەش سابت) چەندین زیندانی دیکە لە زیندانەکاندا سزای لە سێدارەدانیان بەسەردا سەپێندراوە، وریشە مورادی لە ١ـی ئابی ٢٠٢٣ لە نزیک سنە دەستگیرکرا، دوای نزیکەی ٥ مانگ لێکۆڵینەوە لە ناوەندەکانی ئیتلاعات گوازرایەوە بۆ بەشی ژنانی زیندانی ئێڤینی تاران، لە ١٠ـی تشرینی دووەمی ٢٠٢٤ لە لایەن لقی ١٥ـی دادگای شۆڕشی ئیسلامیی تارانەوە بە تۆمەتی “بەغی” سزای لەسێدارەدانی بۆ دەرچوو، پەخشان عەزیزی ٤ی ئابی ٢٠٢٣ەوە لە لایەن ڕژێمی ئێرانەوە لە زیندانەکاندا زیندانی کراوە.

 

" زیندانەکانی ئێران و ڕۆژهەڵاتی کوردستان شوێنی ژنانی خەباتگێڕن"

بەهار مونزیر، چالاکوان و داکۆکیکار لە مافەکانی ژنان ئاماژەی بەوەکرد، تێکۆشانەکانی ژنان لە دوای ڕاپەڕینی ١٩٩١ەوە زیاتر بەرەوپێش دەچێت، لە درێژەی کار و خەباتی ژناندا چەندین ڕێکار گیراوەتەبەر، سەرەڕای هەبوونی ئەو ئەقڵیەتە کۆنە خوازییەی لە ڕۆژهەڵاتی ناوەڕاستدا دەگوزەرێت، بەهێز بوونەوەی باڵی کۆنە خوازی و زیادبوونی دیاردەی عەشایەری، ژنان ڕووبەڕووی دەبنەوە، سەرەڕای هەبوونی ئەو دیاردانە زۆرێک لە چالاکوانان و تێکۆشەران بەرەنگاری دەبنەوەو خەباتی دەستکەوتەکانی مافی ژنان دەبیندرێت وتی: سەرەڕای زیادبوونی توندوتیژی و زیندانی کردنی زۆرێک لە چالاکوانان لە ڕۆژهەڵاتی کوردستاندا، لە دوای شۆڕشی ژینا ئەمینی گۆڕانکاری بەهێز لە ناوچەکە و تەواوی پارچەکانی کوردستان ڕوویداوە، لە دوای شۆڕشەکە هاوڵاتیان و لە ناویاندا ژنان دژ بە دەسەڵاتی ئیسلامی سیاسیی کار و خەباتیان بەرزڕاگرتووە، لە دوای ڕوخانی ڕژێمی شا لە ئێران ژنان لە خەباتی سیاسیی و مەدەنی لە شارە و شاخدا ڕۆڵی بەرچاویان هەبووە، پاشان ژنان لە دوای هاتنی کۆماری ئیسلامی ڕۆڵ و کاریگەریان بەردەوام بەدی دەکرێت، خەباتێکی سیاسیی ژنان لە ڕۆژهەڵاتی کوردستان لە سەردەمانی دەسەڵاتی شا تا ئێستە لە زیندانەکان و دەرەوەی زینداندا بەردەوامی هەیە، سەرهەڵدانی شۆڕشی " ژن، ژیان، ئازادی" هەڵهێنجدراوی ئازار و نەهامەتییەکانی گەلی ڕۆژهەڵاتی کوردستان بوو، هەبوونی قەیرانی ئابووری، ئاستەنگییەکانی ژیان، توندوتیژییەکانی ڕژیمی ئیسلامی و توندوتیژییەکان بەرامبەر ژنان شۆڕشی ژینا ئەمینی هێنایە مەیدانی بیروڕاکانەوە، پڕشنگی ئەم شۆڕشە تەواوی پارچەکانی دیکەی کوردستان و جیهانی گرتەوە، شۆڕشی ژینا ئەمینی تەواوی ئازار و ئاستەنگیەکانی ژنانی هێنایە بیر، کە تەواوی ژنانی جیهان لەسە ئەو پرسە کار و خەباتیان بەردەوامی پێدرا.

 

بەهار مونزیر ئاماژەی بەوەکرد، چالاکوانانی ڕۆژهەڵاتی کوردستان ڕوبەڕووی زیندانی کردن و ئەشکەنجەدان دەکرێنەوە، لە تواوی جیهان پرسی زیندانی کردنی چالاکوانان دەنگی داوەتەوە، ڕێکخراوی "فێمێنیستی ئینتەر ناشناڵ" لە ڕێگەی ڕاپۆرت و پشتگیریەکانیانەوە، هەوڵ بۆ لابردنی سزای لە سێدارەدانی چالاکوانی سیاسی و مەدەنی لە ڕۆژهەڵاتی کوردستاندا دەدەن، وتیشی:"زیندانی سیاسی و مەدەنییەکان لە ڕۆژهەڵاتی کوردستاندا ڕوبەڕووی ئەشکەنجەی سەخت و لەسێدارەدان دەبنەوە، لە دوای شۆڕشی "ژن، ژیان، ئازادی" هێرشەکان و گرتنەکان بەردەوام ڕوی لە زیادکردن کردووە، جیهان هەوڵ بۆ لابردنی سزای چالاکوانی سیاسی و مەدەنی دەدات، تەواوی چین و توێژەکان لە ناوچەکەدا لە ڕێگەی دەسەڵاتدارانەوە بارودۆخی ئابووری و ژیانکردنیان ڕۆژبەڕۆژ ڕوو لە سەختی دەکات، بەڵام گەنجان هەوڵ بۆ هەڵگیرساندنی شۆڕش و ژیانێکی شایستەی خۆیان دەدەن، شۆڕشگێڕان لە ناو زیندانەکاندا هەوڵ بۆ بەرگریکردن و هەڵگیرساندنی شۆڕشی ئازادی دەدەن، بەرەنگاربونەوەی ئەو ڕژێمە لە لایەن شارە کوردیەکانی ڕۆژهەڵاتی کوردستانەوە ڕۆژبەڕۆژ بەردەوامی زیاتر دەبێت، لە چەندین بەرگی جیاوازی وەک یادکردنی جەژنی نەورۆزی کوردی بە شێوەیەکی فراوان لە ناوچە کوردنشینەکان هەوڵ بۆ بەرجەستەکردنی ئاشتی لە ناوچەکەدا دەدەن.

 

"ئێمەی ژنان بە چالاکی و فۆڕمی جیاواز هەوڵ بۆ ئازادبوونی ژنانی زیندان دەدەین"

بەهار مونزیر ئاماژەی بەوەشکرد، ژنان لە دوای شۆڕشەوە لە لایەن ڕژێمی ئێرانەوە زیندانی دەکرێن، لە ناویاندا وریشە مورادی و پەخشان عەزیزی نموونەی بەرخۆدانن لە زیندانەکانی ڕۆژهەڵاتی کوردستاندا وتی: چالاکی و داواکارییەکانی کوردان تەنگی بە دەسەڵاتدارانی ناوچەکە هەڵجنیوە، بەڵام هاوڵاتیان و ژنان لە ناویاندا بەردەوامن لە بەرخۆدانیکردن، ژنانی وەک "وریشە مورادی" و "پەخشان عەزیزی"، چەندین تێکۆشەری دیکە لە زینداندا دژی دەسەڵات دەوەستنەوە، لە ئێستادا سزای لەسێدارەدان تەنگ بە ئازادیخوازان هەڵدەچنێت، لەڕێگەی کۆکردنەوەی واژۆو پشتگیرییەکان لە تەواوی جیهان هەوڵ بۆ لابردنی سزای لەسێدارەدان دەدرێت، ئێمەی ژنان لە باشووری کوردستان لە ڕێگەی پشتیوانی و گەیاندنی دەنگمان بە تەواوی جیهان هەوڵ بۆ لادانی سزاکەیان دەدەین، ژنان لە ڕۆژهەڵاتی ناوەڕاستدا بەردەوام بەدەست سزای دەسەڵاتدارانەوە دەناڵێنن، ئامانجمان ئازادی و یەک دەنگییە بۆ بەدەستهێنانی یەکسانیە بۆ ژنان لە ڕۆژهەڵاتی ناوەڕاستدا.

 

بەهار مونزیر لە کۆتایی قسەکانیدا وتیشی: پێویستە تەواوی چالاکوانان لە هەر ناوچەیەکەی کوردستاندا بۆ بەدەستهێنانی مافەکانی ژنان تێکۆشان بکەن، ئێمەی ژنان لە باشووری کوردستان بە چالاکوانان و ئاشتیخوازانەوە، لە ڕێگەی چالاکی جیاواز و گەیاندنی پەیامەکانامن بە تەواوی جیهان هەوڵ بۆ ئازادکردنی ژنانی هاوشێوەی "وەریشە مورادی" و "پەخشان عەزیزی" دەدەین، ئێمە بەردەوامی بە شۆڕشی " ژن، ژیان، ئازادی " دەدەین، لە چەندین بەرگی جیاواز و چالاکی جیاوازدا درێژە بە خەباتی ژنان لە باشووری کوردستاندا دەدەین.