ناوەندی هەواڵ

 

کاتژمێر ٧:٠٠ی بەیانی پرۆسەی هەڵبژاردنی پێشوەختەی ئەنجومەنی نوێنەرانی عێراق لە سەرانسەری عێراق و هەرێمی کوردستان دەستیپێکرد و کاتژمێر ٦:٠٠ بە وەستانی ئامێرە ئەلکترۆنییەکانی دەنگدان کۆتایی پێهات.

 

بەپێی ئامارەکانی کۆمسیۆنی باڵای هەڵبژاردنەکان لە سەرانسەری عێراقدا  ٢٣ ملیۆن و ٩٨٦ هەزار و ٧٤١ کەس مافی دەنگدانیان هەیە، لەو ژمارەیە ٣ ملیۆن و ٤٨٦ ھەزار و ٧٨٧ کەسی لە هەرێمی کوردستانە کە مافی دەنگدانیان هەیە.

 

بۆ بەڕێوەبردنی پرۆسەی هەڵبژاردن ٨ هەزار و ٢٧٣ ناوەندی دەنگدان ئامادەکرابوون، سێ هەزار و ٢٤٩ كاندید كە ٩٥١ ژن و دوو هەزار و ٢٩٨ پیاون، كێبڕكێ دەكەن لەسەر ٣٢٩ كورسی پەرلەمان.

 

هەر بە پێی ئامارەکانی کۆمسیۆن تا کاتژمێر ٢:٠٠ی نیوەڕۆ ٪١٩ی هاوڵاتیان لە سەرانسەری عێراق بەشداری دەنگدانیان کردووە، کەمترین ڕێژەی دەنگدان لە ناوچەی ڕەسافەی بەغدا بووە، کە ١٠٪ بووە و زۆرترین ڕێژەی دەنگیش لە پارێزگای سەلاحەدین بووە کە ٢٧٪ بووە.

بڕیاریشە دوای ٢٤ کاتژمێر کۆمسیۆنی باڵای هەڵبژاردنەکان ئەنجامە بەراییەکان ڕابگەیەنێت.

 

ت.پ