ناوەندی هەواڵ

 

دوای ئەوەی دادگای ئێران بۆ دووەمین جار سزای لەسێدارەدانی بەسەر وریشە مورادی سەپاند، کۆمەڵگەی ژنانی ئازادی ڕۆژهەڵاتی کوردستان "کژار" بە ڕاگەیاندراوێک ئەم بڕیارەی شەرمەزار کرد.

 

ڕاگەیاندراوەکە بەم جۆرەیە:

دەزگای دادوەریی کۆماری ئیسلامی، لە درێژەی سیاسەتە سەرکوتکەر و دژە ژنەکانی، جارێکی تر بە بانگهێشتکردنەوەی وریشە مورادی، ئەندامی کۆمەڵگەی ژنانی ئازادی ڕۆژهەڵاتی کوردستان "کژار"، بۆ لقی ١٥ی دادگای شۆڕش بە سەرۆکایەتیی دادوەری مەرگ (سەڵاواتی)، هەوڵ دەدات سیناریۆ دووبارەبووەوە و تۆڵەسەندنەوەکانی خۆی دژی تێکۆشانی ژنانی ئازادیخواز پێش بخات.

 

وریشە مورادی دوای تێپەڕاندنی زیاتر لە سێ ساڵ لە بەندکران و خۆڕاگری لە بەرامبەر ئەشکەنجە دەروونی و جەستەییە توندەکان و پێشێلکردنی مافی دەستگەیشتن بە چارەسەر و دیدار لەگەڵ بنەماڵە، بە هەڵوێستی ئاشکرای خۆی و بە ڕاگەیاندنی دانپیانەنان بە دادگاکە، جارێکی تر شەرعییەتی دادگا نادادپەروەرەکانی ڕژێمی خستە ژێر پرسیارەوە. هەڵوێستی پۆڵایینی ئەو، درێژەی هەمان ئیرادەی شۆڕشگێڕانەیە لە بەرامبەر پەتی سێدارە و بڕیارەکانی دادگا.

 

دووبارە دەرکردنەوەی سزای لەسێدارەدان بۆ وریشە مورادی، لە ترسی ڕژێمەوە سەرچاوە دەگرێت لە بەرامبەر ئیرادەی سیاسی ژنان و جووڵانەوەی "ژن، ژیان، ئازادی". ئیرادەیەک کە ئامادە نییە لە بەرامبەر ستەم، سەرکوت و حوکمە دڕندانەکان وەک سزای لەسێدارەدان سەر نەوی بکات.

 

کژار لەگەڵ شەرمەزارکردنی توندی ئەم بانگهێشتکردنەوە دووبارانەو هەوڵدان بۆ دەرکردنەوە یان پەسەندکردنەوەی حوکمە قورسەکان و لەسێدارەدان، ڕای دەگەیەنێت:  ١- بەرپرسیارێتیی ڕاستەوخۆی گیان و تەندروستیی جەستەیی و دەروونیی وریشە مورادی لە ئەستۆی دەزگای دادوەری و دەزگا ئەمنییەکانی دەسەڵاتدایە . ٢. لە سەرجەم ڕێکخراوە نێونەتەوەییەکانی مافی مرۆڤ، ڕێکخراوەکانی ژنان، ئازادیخوازان و ڕای گشتی داوا دەکەین کە لە بەرامبەر ماشێنی سەرکوت و لەسێدارەداندا بێدەنگ نەبن و ببنە دەنگێکی بەرز بۆ هەڵوەشاندنەوەی دەستبەجێی سەرجەم سزاکانی لەسێدارەدان و ئازادکردنی بێمەرجی وریشە مورادی و هەموو ئەو زیندانییە سیاسییانەی سزای سێدارەیان بەسەردا سەپێندراوە.