ناوەندی هەواڵ

 

لەگەڵ مانگرتنی گشتی لە ڕۆژهەڵاتی کوردستان، لە دوو ڕۆژی ڕابردوودا خۆپیشاندانی بەرفراوان بەڕێوەچوو. بەپێی ئەو ڕاپۆرت و وێنە نێردراوانە، بەهۆی تەقەی هێزە ئەمنییەکان و سوپای پاسدارانەوە، لانیکەم ٤ کەس گیانیان لەدەستداوە و زیاتر لە ١٠٠ کەسیش برینداربوون.

 

ئامارە بڵاوکراوەکانی کوژراو و بریندارانی ڕۆژهەڵاتی کوردستان بریتین لە:

 

دێهگۆلان ١ کوژراو و زیاتر لە ١٠ بریندار

سەقز ٢ کوژراو و زیاتر لە ٣٠ بریندار

دیواندرە ٢ کوژراو و ٤٠ بریندار

مهاباد زیاتر لە ١٠ بریندار، تیایدا ژنێکی ٦٠ ساڵان بە سەختی بریندار بوو

بوکان ٧ بریندار

کامیاران ١٠ بریندار

قروە ٢٠ بریندار

بیجار ١١ بریندار

بانە ٨ بریندار

تەکاب ١١ بریندار، هەروەها لە بۆکان کچێکی تەمەن ١٠ ساڵ بە هۆی بەرکەوتنی فیشەک لە سەریدا گیانی لەدەستدا.

 

بەپێی ڕاپۆرتە بڵاوکراوەکان، لە شارەکانی سەقز، دیواندرە، سنە، بیجار و کامیاران ناڕەزایەتی و پێکدادان لەگەڵ هێزە ئەمنییەکان گەیشتووەتە لوتکە و خۆپیشاندەران دروشمی "کوردستان گۆڕستانی فاشیزمە، مەرگ بۆ دیکتاتۆر، ژن ژیان ئازادی"یان وتووە، هەروەها هێرشکراوەتە سەر پاریزگای شارەکان و بە هێنانە خوارەوەی تابلۆ و سووتاندنی لافیتە و وێنەی خامنەیی، توڕەیی و بێزاری خۆیان دژی ڕژێمی فاشیستی ئێران خستووەتەڕوو.

 

ڕاپۆرتەکان ئاماژە بەوە دەدەن کە دەیان خۆپیشاندەر لە شارەکانی سنە، مەریوان، پاوە، بانە و شارەکانی دیکەی ڕۆژهەڵاتی کوردستان دەستگیرکراون و بۆ شوێنێکی نادیار گوازراونەتەوە.