ناوەندی هەواڵ

 

به‌ڕێوه‌به‌رایه‌تیی بەرەنگاربوونەوەی تاوانە ڕێکخراوەکان، کە ساڵی ٢٠١٨ دامه‌زراوه‌، دوێنێ ١٤ی ئاب ئاماری سێ ساڵی بارزگانیکردن بە مرۆڤی لە هەرێمی کوردستان بۆ ساڵەکانی ٢٠١٩-٢٠٢٠-٢٠٢١ بڵاوکردەوە.

 

بەپێی ئامارەکان بەرێوەبەرایەتییەکە، کە سەر بە حکومەتی هەرێمی کوردستانە، تا ئێستا ٣٥٤ کۆمپانیا بەدواداچوونیان بۆ کراوە کە ١٢یان دراونەتە دادگا، لە پارێزەرانیش ٣٧ کەس بەدواداچوونیان بۆ کراوە و دووانیان دراونەتە دادگا و لە هاووڵاتییانى بیانیش ١٤٩٨ کەس چاوپێکەوتنیان لەگەڵ ئەنجامدراوە کە لەم ژمارەیە ١٠٨ کەسیان قوربانیی بازرگانیکردن بوون بە مرۆڤ و ١٧یان ڕەوانەى داڵدەکراون و ١٧ى تریشیان گەڕێنراونەتەوە وڵاتى خۆیان و ٤ هاووڵاتیى بیانیش دیپۆرت کراونەتەوە.

 

بەپێی ئامارەکان لە ماوەی سێ ساڵدا ژمارەی تاوانەکان بەم شێوەیە تۆمار کراوە:

ـ کارکردن بە زۆرە ملێ (سوخرە): ١٧ حاڵەت

ـ بازرگانی سێکسی: ٩ حاڵەت

ـ بازرگانی بە ئەندامانی لەشی مرۆڤ: ٣٣ حاڵەت

ـ بازرگانی بە منداڵ: ١ حاڵەت

ـ بازرگانی بە ئەوانەی تەمەنیان لە ١٨ ساڵ کەمترە: ١١ حاڵەت

ـ کاری بە قاچاغ بردن: ٧ حاڵەت

ـ بەکارهێنانیان وەك سواڵکەر: ١٠ حاڵەت