ژونا ئەردەلان

 

سنە- ژنانی سنە بەشداریکردنی دوکاندارەکانی شاری سنەیان لە مانگرتنی سەرتاسەریدا بەرز نرخاند، چونکە سەرەڕای هەڕەشە و گرتن و فشارەکانی سەریان، بەڵام دوکاندارەکانی ڕۆژهەڵاتی کوردستان چەندین جار بەشداری مانگرتنی سەرتاسەرییان کرد و دوکانەکانیان داخست.

 

سنە یەکێک بوو لەو شارانەی کە هەرچەندە لە ڕووی ئابوورییەوە لە دۆخێکی زۆر سەختدا بوو، بەڵام لە شۆڕشی ژینادا بە شەرەفمەندانە مامەڵەی کرد و ئەم دۆخەش نەبووە هۆی ئەوەی بازرگان و کاسبکاران لە دواوە بمێننەوە، بەڵکوو هەر جارێک بە توندتر بەشدارییان لە مانگرتنەکاندا دەکرد.

 

ئەمەش لەکاتێکدایە کە چەند مانگێک پێش ساڵیادی ژینا ئەمینی، زۆرێک لە دوکاندارەکان بانگهێشتی ناوەندی ئیتلاعات کران و بەڵێننامەیان لێوەرگیرا کە نابێت بەشداری لە هیچ مانگرتنێکدا بکەن و دوکانەکانیان دابخەن، بەڵام سەرەڕای هەموو ئەو هەوڵانەی ڕژێم، کاتێک لەلایەن حزب و لایەنەکانەوە بۆ ساڵیادی ژینا داوای مانگترنی سەرتاسەری کرا، لە هەموو شارەکانی ڕۆژهەڵاتی کوردستان دوکانداران مانگرتنی تەواویان ئەنجامدا و شاری سنەش وەک هەمیشە سەرکەوتوو بوو.

 

لە پای بەشدارییان لە مانگرتنەکان و بەرچاوخستنی خەباتی مەدەنییان، ژنان نامەی سوپاسگوزارییان بە دروشمی "ژن، ژیان، ئازادی" بەسەر دوکاندارەکاندا دابەشکرد و ڕایانگەیاند، بەردەوام دەبین لەم کارە، دوکاندارەکان ئاگاداریان دەکەینەوە کە ئێمەی خەڵک قەدریان دەزانین، ئەوانیش دەڵێن کە ئەمە وایان لێدەکات بەشداری مانگرتنی دوکاندارەکانی داهاتوو بکەن، چونکە دەزانن خەڵک پشتی نییە و ئاگاداری قوربانیدانی خۆیانن.