سلێمانی

 

پاشنیوەڕۆی ئەمڕۆ لە هۆڵی خاک لە شاری سلێمانی، حیزبی شوعی کوردستان مەڵبەندی سلێمانی بە بۆنەی ٨ی ئادار، ڕۆژی جیهانیی ژنان، پانێڵێکیان وەک هەوڵێکی ڕۆشنبیری بۆ خستنەڕووی کێشە و گیروگرفتەکانی ناو کۆمەڵگە و پرسە هەستیارەکانی ژنان لە چەند دیدێکی جیاوازەوە پێشکەشکرد.

لە پانێڵەکەدا هەریەک لە شلێر عەبدول مەجید، مامۆستای زانکۆ، بابەتێکی سەبارەت بە "دۆخی ژنان و دیدی حیزبی شیوعی" پێشکەشکرد، پەیمان عزەدین، چالاکوان و پارێزەر سەبارەت بە "کێشە یاساییەکانی ژنان و ڕێگە چارەسەرییەکان" بەشداربوو، هەروەها هاوژین مەلا ئەمین، مامۆستای زانکۆ لە بارەی "سەرنجێک لەمەڕ کلتوری چەوساندنەوەی ژنان" بابەتێکی پێشکەشکرد.

 

شلێر عەبدول مەجید، مامۆستای زانکۆ و ئەندامی حزبی شیوعی کوردستان لە لێدوانێکی تایبەتیدا بۆ نوژنها وتی: ژنان ڕووبەڕووی توندوتیژی دەبنەوە لەلایەن خێزان و دەسەڵات و دابونەریت، ئەمەش بووەتە هۆکارێک تا ژنان بکوژرێت، وەک حزبی شیوعی بڕوامان وایە کە پێشکەوتنی کۆمەڵگە بەندە بە هێز و ژمارەی بەشداری ژنان لە کایە جیاوازەکانی کۆمەڵگەدا.

شلێر عەبدول مەجید ئاماژەی بەوەشدا کە پێویستە توندوتیژی و نایەکسانی نەمێنێت و ئەوکاتە دەتوانین بڵێین کۆمەڵگە بەرەوپێش دەچێت، "ئێمە هەوڵ دەدەین نەک تەنها ژنان، بەڵکو کۆمەڵگەش هۆشیار بکەینەوە، و هەوڵدەدەین هێزی کاری ژنان هێزێکی چالاکانە بێت تا مافەکانی دەستەبەر بکات".

ت.پ