ناوەندی هەواڵ

 

ئەمڕۆ لە بەردەم نەخۆشخانەی هیوا لە سلێمانی لە دژی بە تایبەتكردنی کەرتی تەندروستی، کۆنگرەی ئازادی و گۆرانکاری بە هاوبەشی سەنتەری بەرگری لە مافەکانی منداڵانی کوردستان کۆنگرەیەکی ڕۆژنامەوانیان ئەنجامدا.

 

لە کۆنگرەکەدا ڕاگەیەندراوێک لەلایەن شنە عەلی، چالاکوان خوێندرایەوە و تیایدا هاتووە، "نزیکەی مانگێکە وەزارەتی تەندروستی گرێبەستی لەگەڵ کۆمپانیایەکی ئەهلیدا ئیمزا کردووە و کە ئەمەش ناڕەزایەتی هاوڵاتیانی لێکەوتوەتەوە، جۆرەها کار و چالاکی لێکۆڵینەوە دژ بەو کارە ئەنجامدراوە تاکو کار گەیشتە ئەوەی وەزیری تەندروستی چوار دیدار و کۆنگرەی رۆژنامەوانی بە مەبەستی پاساو هێنانەوە بۆ ئەو گرێبەستە، ئەنجامداوە کە بە هەر جۆرێک بوایە دەیویست خۆی لەم بڕیارە کارەساتبارە بدزێتەوە.

 

شنە عەلی وتیشی: جێگای سەرنجە لە ئێستادا وەزارەتی تەندروستی بێدەنگی هەڵبژاردووە و دەیانەوێت خۆیان لە ئاست ناڕەزایەتی هاوڵاتیان بدزنەوە و مەبەستیشیانە بە بێدەنگی بڕیارەکانیان جێبەجێ بکەن، بەڵام ئێمە وەک کۆنگرەی ئازادی و گۆڕانکاری ڕایدەگەیەنین، گەر وەزارەتی تەندروستی پێداچوونەوە بەم کارەدا نەکات و بڕیارەکە هەڵنەوەشێنێتەوە، ئەوا ناڕەزایەتیەکانی شەقام بەردەوام دەبێت.