شیعری ئەمڕۆ: شەهید

شیعری "شەهید" بەرهەمێکی شاعیر ژیلا حوسێنییە (١٩٦٤-١٩٩٦) کە لە کتێبی "گەشەی ئەوین"دا بڵاوی کردووتەوە.

 

ڕۆژێ هەرد، و گوڵ، و درەخت و مەل
لە قوڵپی گریانی هەتاو
سەریان سووڕ ما
گوڵ چارشێوی دا بە سەریا
هەموو تێکڕا چوون لەگەڵیا
چوون بۆ لای خۆر...
چاک و چۆنی؟... چی قەوماوە؟
خۆر هەناسەیەکی هەڵکێشا و
دەستی بۆ دۆڵێ ڕاکێشا
لەو دۆڵەدا، لە باوەشی گوڵجاڕێکا
ڕەوە ئەسپێکی سم تەڵا
نۆمایەکیان هەر بە یاڵی خوێنینەوە
لە سەر سنگی خاک ڕاکێشا
هەردە و کێو و گوڵ و گیا
هەموو گریان.